Belgili dintanýshy, imam Nurlan Baijigituly elimizde kiik atýǵa ruqsat berilgen tusta shariǵat talaptaryn saqtaýǵa shaqyrdy, dep habarlaidy Dalanews.kz Nege.kz-ke silteme jasap.
“Jalpy, daladaǵy ań-qusty kez kelgen adam ata berýge bolmaidy. Iaǵni, tabiǵatymyzdyń qorǵalýy zańmen tyiym salynǵan bolsa, musylman iaki hristian bolsa da, dinimizde brakonerlik aram bolyp esepteledi”, — deidi ol.
Ol qazaq halqynyń kiikti ejelden kieli sanap kelgenin, tek asa qajettilik týyndaǵanda ǵana atýǵa bolatynyn atap ótti.
“Qazaq halqy kiikti erekshe kie tutqan. Qajettilik týyndaǵanda atyp, soiyp jeýge bolatyn shyǵar. Biraq múiizi úshin saiyn dalada erkin josqan kiik malyn qyryp tastaýǵa bolmaidy. Qazir kiik sany kóbeiip, atýǵa ruqsat berildi ǵoi. Desek te, kez kelgen ań-qusty atýdyń shariǵat qoiǵan normasy bar”, — dep qosty ol.
Imam shariǵatta ań-qus atý men soiýdyń naqty talaptary bar ekenin de túsindirdi.
“Birinshi, kez kelgen ań nemese mal Allanyń atymen, “bismilla” sózimen soiylýy kerek. Oq pen sadaq atylǵan ań bolsa da baýyzdalýy tiis. Iaǵni, mal qannyń tolyq shyǵyp ketkeninen keiin ólýi kerek. Mysaly, qan shyǵar-shyqpai, kesildi-kesilmedi, kez kelgen ań-qus sýǵa batyp ólse aram bolady. Demek, pyshaqtyń sebebimen "bismilla" aityp baýyzdap, qan aqqan soń adal bolady”, — dedi ol.
Sonymen qatar, “bismillany” kim aitatyny da mańyzdy ekenin jetkizdi.
“Bismillany” kim aitady? Ony “bismillanyń” iesi aitady. Iaǵni, musylman, hristian, iahýdi bolýy kerek. Nege úsheýin birge aitady? Bul úsheýi de aspannan túsken “Taýrat”, “Zabýr”, “Injil”, “Quran” kitabyn moiyndaidy. Sol úshin bulardyń maly “bismilla” dep soiylsa, adal bolady. Eger ateist, otqa, sýǵa, músinge tabynatyndar óltirse, ol kiiktiń eti aram delingen. Bul aiatta jazylǵan. Iaǵni, olar “Bismilla” aitsa da, adal dep eseptelmeidi”, — dep túiindedi imam.
