Eldiń bas qalasyn damytýdyń jańa strategiiasy usynylyp, tujyrymdamasy jasaldy. Ol boiynsha 2006 jyldan bastap, Astananyń kelbeti túbegeili ózgeretin boldy.
Alǵash syn sadaǵyna oń jaǵalaýdyń negizgi kósheleri Saryarqa men Respýblika dańǵyly ilikti. Qalanyń jadaý, keńestik kezeńdegi keipin tolyq ózgertýge sheteldikter tartylyp, qalanyń kólik máselesin sheshý Singapýrlyqtarǵa, jaryqtandyrý belgili Phillips firmasyna tapsyryldy. Astanadaǵy jarnama álemi damyǵan qalalardaǵydai deńgeige jetti. Álemdik brendterdiń logotipteri úilerdiń tóbesindegi úlken bilbordtarǵa ornalastyrýǵa kóshti.
Budan keiin ákimshilik sol kezde kúshine engen, qurylys salýshynyń memlekettik litsenziia alý úshin jańa talaptar qarastyrylǵan «Úleskerlik qurylys týraly» zańdy basshylyqqa alyp, ózine deiingilerdiń eshqaisy qaperine almaǵan qaladaǵy zańsyz qurylystarǵa qarsy kúres bastaldy. Tek ofisi men kompiýteri ǵana bar olardan qajetti tehnika men óndiristik bazasy talap etildi. Kóptegen qurylys nysandaryn toqtatyp, talapqa sailaryna ǵana jumys isteýge ruqsat berildi. Qurylys talapqa sai jolǵa salynǵannan keiin, bazarlar qala syrtyna shyǵarýǵa kúsh salyndy. Pavlodar baǵytynda jol boiyna qurylys materialdary, Soltústik ainalma jol aýmaǵynda kólik bazaryn salý, Tilendiev dańǵylynda saýda, avtokólik ortalyqtaryn ornalastyrý bastaldy. Astananyń bas josparynyń tujyrymdamasy men ishinde Elorda ortalyǵyndaǵy eń úlken ǵimarat –«Temir Qazyq» jobasy bar birneshe iri joba usynyldy. 2006 jyldyń sońyna qarai Astanada birqatar qurylys nysandary ashyldy. 14 qarashada Qazaqstan Respýblikasyndaǵy Amerika Qurama Shtattarynyń Elshiligi ǵimaraty, 12 jeltoqsanda jańa Etolon ortalyǵy men bes juldyzdy Radisson SAS qonaq úii, 13 jeltoqsanda Ministrlikter úiimen irgeles ornalasqan «Qazyna Taýer» ǵimaraty, 14 jeltoqsanda Qazaqstan Respýblikasynyń «Ulttyq arhivi» ǵimaraty paidalanýǵa berildi. 2007 jyldyń qala kúnine orai aýmaǵy 23,7 gektar bolatyn Prezidenttik saiabaq, aýmaǵy 21 gektar bolatyn «Jeruiyq» saiabaǵy men aýmaǵy 30,8 gektar bolatyn «Arai» etnografiialyq saiabaǵy ashyldy.
Jazdyń qamyn qysta oilaǵan «AstanaJasylqurylys» AQ aqpanda Elordany kógaldandyrý tujyrymdamasyn engizdi. Kóktem shyǵa ákimdik sol jaǵalaýda turǵyzylǵan jańa qalaǵa kóshe ataýlaryn berýdi bastady. Naqty aitqanda 1 naýryz kúni №1 kóshege «Táýelsizdik», №2 kóshege «Dostyq», №12 kóshege «Saraishyq», №19A, 33, 35 nómirli kóshelerge ret-retimen «Almaty», «Aqmeshit», «Orynbor» ataýy berilip, №19 kóshege «Syǵanaq», №34 kóshege «Túrkistan», №78 kóshege «Saýran» ataýy buiyrdy. «Qazaqstan Respýblikasynyń Konstitýtsiiasyna ózgerister men tolyqtyrýlar engizý týraly» Qazaqstan Respýblikasynyń 2007 jylǵy 21 mamyrdaǵy Zańyna sáikes Astana qalasy elimizdiń negizgi zańynda alǵash ret Qazaqstannyń astanasy retinde qujattaldy. 31 mamyrda Astana mańyndaǵy Aqmol aýylynda saiasi qýǵyn-súrgin qurbandaryna arnalǵan «ALJIR» memorialdy-murajai kesheniniń ashyldy. 21 maýsymda arnaiy jarlyqpen «Astana - jańa qala» arnaiy ekonomikalyq aimaǵynyń aýmaǵy 4842,3 gektardan 5440,4 gektarǵa (589,1 ga) ulǵaityldy. Bul kezeńderde Elordanyń kelbeti kún sanap kórkeiip, astanalyq aishyǵy aitarlyqtai aiqyndalyp, resmi adamdar, týrister men qonaqtardyń jan jaqtan aǵylyp kelip jatqan kezi edi. Sondai mártebeli meimannyń biri maýsymda Qazaqstanǵa jumys saparymen jáne áieli Sofiia patshaiymmen birge kelgen Ispaniia koroli I Hýanom Karlos bolatyn. Monarh pen onyń jubaiy Astana qalasynyń kórneki jerlerin kórdi. Osy kúni olar Beibitshilik jáne kelisim saraiy janyndaǵy «Qazaqstan halqynyń dostastyǵy» monýmentiniń ashylýyna qatysty.
Astana qalasy úshin shilde aiy - túrli merekelik sharalar men ashylym, tanystyrylymdar aiy. Shilde aiynyń basynda Islam mádeni ortalyǵy «Nur Astana» meshitinde medrese oqýshylary úshin jańa jataqhana ashylsa, Manas jáne Muńaitpasov kósheleriniń qiylysynda «Nur Otan» halyqtyq-demokratiialyq partiiasynyń astanalyq filialy, Esil ózeniniń boiyndaǵy M-2 kópiri, Kóktal aýylyndaǵy qarttar men múgedekterge arnalǵan 416 oryndyq internat-úii ashyldy. Sonymen qatar, «Astana - Eýraziianyń injý-marjany» Halyqaralyq sýretshiler simpoziýmy ótti. Jáne de «Ońtústik-Shyǵys» yqshamaýdanynda jáne Elordanyń jańa ákimshilik ortalyǵynda ornalasqan «Jeruiyq» jáne «Arai» jańa saiabaqtary, halyqaralyq úrmeli orkestrler festivali, sahna kostiýmderiniń halyqaralyq festivali, dańqty qolbasshy Bógenbai batyrdyń eskertkishi ashyldy. Sonymen qatar, osy kúnderi Astana qalasy indýstriialyq parki aýmaǵynda salynatyn zaýyt qurylysynyń irgetasyna kapsýla qoiylyp, serpindi joba tanystyryldy.
6 shilde - qala kúni merekesinde Astana halyqaralyq áýejaiyna baratyn tas joldyń ainalasynda «Astana Juldyzy» monýmenti ashyldy. 2007 jylǵy Astana kúnin merekeleý aiasynda sýretshilerdiń halyqaralyq «Astana sýretshiler kózimen» simpoziýmyna qatysýshylar jumystarynyń kórmesi, «Astananyń sýretin salamyn!» atty balalardyń asfaltqa sýret salýdan halyqaralyq baiqaýy, «Astanam - maqtanyshym» atty aqyndar men jazýshylardyń halyqaralyq konkýrsy, dostyq kezdesýler, Astana jáne Máskeý qalasy ardagerleriniń komandalary arasyndaǵy fýtbol, Halyqaralyq «Shashý» bi festivaline qatysýshylardyń gala kontserti, Sýly jasyl jelek jolyndaǵy sý burqaqtyń ashylýy, «Astana.KZ» Halyqaralyq estrada festivaliniń gala-kontserti, qazaqstandyq jáne sheteldik estrada juldyzdarynyń qatysýymen kontserttik baǵdarlama, karnaval sherýi, lazerlik-mýzykalyq shoý tárizdi is-sharalar ótkizildi. Elorda toiyna tartý retinde 2600 kórermenge arnalǵan, álemdik standartqa sai, jarys ótkiziletin alańynyń uzyndyǵy – 1800 metr «Qazanat» atshabary ashyldy. Sarsha tamyzda Qazaqstan Respýblikasynyń densaýlyq saqtaý salasyn reformalaý men damytýdyń 2005-2010 jyldarǵa arnalǵan memlekettik baǵdarlamasyn iske asyrý aiasynda qurylǵan Astana meditsinalyq klasteriniń nysandarynyń biri –«Ana men bala ulttyq ǵylymi ortalyǵy» men qyrkúiekte Halyqaralyq qazaq-túrik litseii ashyldy.
Qazan aiynyń basynda qala basshysy qol astyndaǵylarǵa qalada qoǵamdyq kólikpen júrý mindetin qoidy jáne jaǵdaidy baqylaý úshin ózi de aptasyna eki-úsh ret qoǵamdyq kólikpen júretinin jetkizdi. Bul aktsiia avtobýs kestesi men qyzmet kórsetý mádenietin saqtaýǵa múmkindik beredi. Qala ákimniń orynbasarlary men bólim bastyqtary qoǵamdyq kólikti jii paidalanýy kerek. Eger qoǵamdyq kólikter turaqty jáne qatań keste boiynsha júretin bolsa, onda jeke kólikterge naqty balama bolady. Bul óz kezeginde Elordanyń ekologiiasyn jaqsartyp, astanalyq kúre joldardaǵy keptelisterden aryltady.
Qyrkúiek aiynda júike, endokrindik, tirek-qimyl apparaty buzylǵan patologiiasy bar balalar men jasóspirimderdiń qoǵamǵa, ómirge beiimdelýine meditsinalyq, áleýmettik, psihologiialyq-pedagogikalyq kómek kórsetýge arnalǵan respýblikalyq balalardy ońaltý ortalyǵy alǵashqy patsientterin qabyldady. Qazan aiynda MEGA saýda-oiyn-saýyq ortalyǵy ashyldy. Sondai-aq, «Abý-Dabi Plaza Astana» kesheniniń tusaýkeseri ótti. Qarashada «Qazaqstan Respýblikasy Prezidentiniń janyndaǵy Astananyń Sáýlet keńesi týraly» Jarlyqqa qol qoiyldy.
Astananyń 2008 jyldyń basyndaǵy basty jańalyǵy Elordada Internetke symsyz qosylýdyń ortalyqtandyrylǵan jelisi qurylatyny boldy. Buǵan deiin Wi-Fi Astana halyqaralyq áýejaiynda, Eýraziia ulttyq ýniversitetinde jáne Elordanyń keibir saýda ortalyqtarynda jumys istese, qosylýy osy jylǵa josparlanǵan elýge tarta núkte qalanyń edáýir aýmaǵyn qamtityn edi. Shahardyń zamanǵa sai jańǵyrýy tek munymen toqtaǵan joq. Aqpan aiynda Astana kósheleri men dańǵyldaryna jańadan ataý berý, qaita ataý nemese biriktirip ataý týraly sheshim qabyldandy. Osyǵan orai, keshegi keńes dáýirinen qalǵan totalitarlyq ataýlar ózgertilip, oǵan qosa jańadan boi kótergen aýdandar men kóshelerge zamanǵa sai jańadan 309 ataý berildi. Jańa mekemelerdiń ashylýy da óz kezegimen júrip jatty. Jańa otbasyn josparlaý ortalyǵy ashyldy. Sondai-aq, Elordada «Astana-Báiterek» klýbynyń qoldaýymen «Delovoi mir» jýrnaly bastamashy bolǵan «Astana – meniń taǵdyrym» atty jobanyń tanystyrylymy ótti.
Elordanyń osyndai sony úrdisi, zamanaýi sipaty álem damyǵan saiyn sol kóshten qalmai ósýi, órkendeýi qajet. Ol úshin kózi ashyq, kókiregi oiaý -qajyrly eńbek eskerilip, jarqyn bastamalar árqashan qoldaý taýyp jatýy qajet.
Bolatbek Tólepbergen,
Prezidenttiń BAQ salasyndaǵy syilyǵynyń laýreaty,
Halyqaralyq «Alash» ádebi syilyǵynyń laýreaty,
Memlekettik «Daryn» jastar syilyǵynyń laýreaty
Elorda shejiresi: Damý dáýiri
