Oljas Bektenov ICBC basshysy Liý Tsziýnmen 1 mlrd iýannan astam investitsiia tartý máselesin talqylady, dep habarlaidy Dalanews.kz.
Qazaqstan Respýblikasynyń Premer-ministri Oljas Bektenov Industrial and Commercial Bank of China basqarma tóraǵasy Liý Tsziýnmen kezdesý ótkizdi. Onda investitsiialyq yntymaqtastyqty tereńdetý perspektivalary jáne uzaqmerzimdi qarjylandyrýdy tartý máseleleri talqylandy.
2024 jyly Qazaqstan men Qytai arasyndaǵy ekijaqty taýar ainalymy $44 mlrd-ty qurap, rekordtyq kórsetkishke jetti. 2025 jyldyń 4 aiy qorytyndysy boiynsha ózara saýda kólemi odan ári ósip, taýar ainalymy ótken jyldyń sáikes kezeńimen salystyrǵanda 3,4%-ǵa ósti. Búginde Qytai Qazaqstan ekonomikasyndaǵy eń iri investorlardyń bestigine kiredi, jinaqtalǵan kapital salymdarynyń kólemi $26 mlrd-ty quraidy.
Premer-ministr Qytai Qazaqstannyń negizgi saýda-ekonomikalyq jáne investitsiialyq seriktesi sanalatynyn atap ótti.
«Memleket basshysy ekonomikaǵa investitsiia tartý mindetin qoidy. Úkimet halyqaralyq qarjy institýttarymen yntymaqtastyqty nyǵaitý baǵytynda belsendi jumys júrgizýde.
Qazaqstan men Qytaidyń eki el kóshbasshylary arasyndaǵy tikelei dostyǵyna negizdelgen senim men syilastyq bailanystary tereńde jatyr. Biz ICBC-men uzaqmerzimdi strategiialyq seriktestikti damytýǵa múddelimiz. Jańa birlesken bastamalardy júzege asyrý eki el arasyndaǵy qarjy-ekonomikalyq bailanystardy nyǵaitýǵa jáne birlesken damýdyń jańa kókjiekterin ashýǵa yqpal etedi», — dep atap ótti Oljas Bektenov.
Qazaqstanda ICBC enshiles banki – «Almaty qalasyndaǵy Qytaidyń saýda-ónerkásip banki» AQ enshiles banki jumys isteidi. Kezdesýde ICBC ekonomikanyń negizgi salalaryn qoldaýǵa qatysqany, onyń ishinde «Báiterek» holdingimen birlesken jobalardy júzege asyrǵany atap ótildi.
Osylaisha, 2025 jyldyń naýryz aiynda Holding «Agrarlyq nesie korporatsiiasy» AQ qarjylandyrý úshin 430 mln iýan tartty. Bul Qazaqstannyń agrarlyq salasyn turaqty túrde uzaqmerzimdi qarjylandyrýdy qamtamasyz etýdegi mańyzdy qadam boldy.
Qazirgi ýaqytta «Ónerkásipti damytý qory» AQ úshin 1 mlrd iýannan astam somaǵa qosymsha nesie tartý múmkindigi pysyqtalýda. Sondai-aq 5 mlrd iýanǵa deiingi kólemdegi obligatsiialardy ornalastyrý arqyly Qytaidyń qaryz naryǵyna shyǵý perspektivasy qarastyrylýda.
QR Úkimetiniń turaqty jáne «jasyl» qarjylandyrý jobalaryn qosa alǵanda, jańa quraldardy birlesip júzege asyrýǵa ashyqtyǵy, sondai-aq ónerkásipti, infraqurylymdy jáne eksporttyq áleýetti qoldaý tetikterin damytý ázirligi atap ótildi.
Liý Tsziýn ICBC qarjy júiesin qoldaýǵa jáne innovatsiialardy damytýǵa baǵyttalǵan yntymaqtastyqty keńeitýge umtylatynyn atap ótti. Onyń aitýynsha, Qazaqstan men Qytaidyń ekijaqty qarym-qatynastardy, onyń ishinde eki eldiń biznes-qoǵamdastyqtary arasyndaǵy belsendi ózara is-qimyly arqyly nyǵaitýǵa tolyq múmkindigi bar.
Kezdesý qorytyndysy boiynsha taraptar birlesken jobalardy júzege asyrýdaǵy yntymaqtastyqty odan ári nyǵaitýǵa nietti ekenin jetkizdi.
