Qazaqstan musylmandary dinı basqarmasy (QMDB) sharıǵatqa saı kelmeıtin birqatar tanymal oıyndardy atady, dep habarlaıdy Dalanews.kz Kursiv media-ǵa silteme jasap.
QMDB-nyń habarlaýynsha, zorlyq-zombylyq, kisi óltirý, soǵys, dindi mazaq etý jáne dinsizdik elementteri bar oıyndar sharıǵatqa múlde qaıshy. Bul qatarǵa Counter-Strike 2, Dota 2, GTA, League of Legends, Minecraft jáne Genshin Impact sekildi jobalar kiredi. Oǵan negiz retinde Máıda súresinen úzindi keltirilgen.
“Áı múminder! Araq, qumar, tigilgen tastar (puttar) jáne bal ashatyn oqtar las, shaıtannyń isterinen. Odan saqtanyńdar, qutylarsyńdar”, – dep jazylǵan Máıda súresiniń 90-aıatynda.
Atalǵan oıyndarda kórinis tabatyn qatygezdik pen adamgershilikke jat áreketter ıslam qundylyqtaryna qarama-qaıshy bolǵandyqtan, sharıǵat boıynsha olardy oınaýǵa tyıym salynǵan.
“Onyń ornyna logıkalyq, tanymdyq jáne bilim beretin mazmundaǵy oıyndarǵa ruqsat etilgen. Paıǵambarymyzdyń (oǵan Allanyń sálemi bolsyn): “Júrekterge anda-sanda tynyǵý berińder” degen hadısi eske sala otyryp, oıyn arqyly demalýǵa ruqsat etiletini, biraq onyń shekten shyqpaýy kerektigin aıtamyz”, – dep jazylǵan jaýapta.
Elektrondy oıyndar kelesi sharttarǵa saı bolsa, tutastaı tyıym salynbaıdy:
- Dinı mindetterdi oryndaýǵa kedergi keltirmeýi tıis;
- Qumar oıyn elementteri bolmaýy kerek;
- Jeke tulǵa men psıhıkaǵa zıan keltirmeýi tıis;
- Dóreki sózder, balaǵat pen ádepsizdik bolmaýy tıis;
- Aqyl-oıdy damytyp, tym kóp ýaqyt almaýy tıis.
