Memleket basshysy Aqmola oblysynyń ákimi Marat Ahmetjanovty qabyldady, dep habarlaidy Dalanews.kz.
Qasym-Jomart Toqaevqa Aqmola oblysynyń biylǵy birinshi jartyjyldyqtaǵy áleýmettik-ekonomikalyq damýy men óńirdi órkendetý perspektivasy jóninde baiandaldy.
Marat Ahmetjanov oblysta barlyq negizgi kórsetkish boiynsha ósim saqtalyp otyrǵanyn jetkizdi. Óńir aýyl sharýashylyǵy ónimderiniń jalpy kólemin 1,2 trillion teńgege deiin jetkizip, eldiń agrarlyq sektorynyń kóshbasshysy retindegi ornyn nyǵaitýdy kózdep otyr. Biyl ónimdiligi óte joǵary, sonyń ishinde maily daqyldar alqaby 2,5 ese ulǵaidy.
Prezidentke investitsiialyq jobalardy iske asyrý jóninde málimet berildi. Arshaly aýdanynda respýblikalyq mańyzy bar Aqmola indýstriialyq aimaǵy quryldy. Jalpy quny 4 milliard dollardan asatyn investitsiialyq portfel jasaqtaldy. Osy arqyly 10 myńǵa jýyq jumys orny ashylady.
Memleket basshysyna áleýmettik infraqurylymdar qurylysynyń barysy tanystyryldy. Sońǵy eki jyl ishinde 4,7 myń turǵyn baspanaly boldy. Bul aldyńǵy jeti jyldyń kórsetkishine teń. Osylaisha, kezekte turǵan halyqtyń áleýmettik osal toby 29 paiyzǵa azaidy. Qosshy qalasynda úleskerlerdiń máselesi oń sheshilip jatyr.
Bilim berý salasynda eki jyl ishinde 21 myń oqýshyǵa arnalǵan 33 nysan boi kóterdi. Jańa oqý jyly qarsańynda óńirde apatty jaǵdaidaǵy jáne úsh aýysymdy mektepter máselesi tolyq sheshildi.
Jylytý maýsymyna daiyndyq josparǵa sai júrgizilip jatyr. Kókshetaýda elektr qýaty 240 Mvt, al jylý qýaty 520 Gkal/saǵat bolatyn jylý elektr ortalyǵy salyna bastady. Sý tazartý nysandarynyń qurylysy aiaqtalýǵa jaqyn. Sonyń nátijesinde oblys ortalyǵynda turatyn 200 myń turǵyn sapaly aýyz sýmen qamtylady. Jyl sońyna deiin 9 eldi mekenge gaz qubyry tartylady.
Kezdesý sońynda Prezident renovatsiia baǵdarlamasy arqyly halyqtyń áleýmettik osal tobyn baspanamen qamtýdaǵy oblystyń oń tájiribesin atap ótti.
Memleket basshysy egin jinaý naýqanyn uiymdastyrý, Qosshy qalasynyń damýy boiynsha tiisti sharalardy qabyldaý, sý tasqynyna qarsy júieli jumys júrgizý, sondai-aq investitsiia tartý jóninde naqty tapsyrma berdi.
