Kárim Másimovtiń záýlim úiinen tárkilengen 43 zat aýktsion arqyly satyldy, dep habarlaidy Dalanews.kz.
Saýda 15 tamyz kúni e-Qazyna platformasynda ótti. Bastapqy baǵa shamamen 7 mln teńgeni quraǵan. Nátijesinde qylyshtar men estelik monetalar sekildi zattar 10 mln teńgege satylyp ketti.
Erejege sáikes, aýktsion jeńimpazy saýda aiaqtalǵannan keiin on jumys kúni ishinde satýshymen kelisimshart jasasýy tiis. Jeńimpaz aktivti tek qarajat tolyqtai satýshynyń shotyna túskennen keiin ǵana alady.
Túsken qarjy áleýmettik mańyzy bar bilim berý, densaýlyq saqtaý jáne infraqurylymdy damytý jobalaryn qarjylandyratyn Arnaiy memlekettik qorǵa baǵyttalady. Qor qarajaty sondai-aq halyqtyń áleýmettik osal toptaryn qoldaýǵa jumsalady.
Eske salaiyq, buǵan deiin Másimovtiń Astanadaǵy záýlim úii úshinshi ret saýdaǵa qoiylǵan bolatyn.
Aýktsion 13 mamyr kúni ótýi kerek bolǵan.
Qaitarylǵan aktivterdi basqarý jónindegi kompaniia Nura aýdany Ereimentaý kóshesi, 1 mekenjaiynda ornalasqan eńseli záýlim úidi satýǵa qoiylǵan bolatyn.
Bastapqy baǵasy – 1,8 mlrd teńge, kepildik jarnasy – 118 mln teńge.
Qyzyǵy, dál osy úidiń sýretterin 2022 jyly Ulttyq qaýipsizdik komiteti eks-tóraǵa Kárim Másimov qamaýǵa alynǵan kezde jariialaǵan edi. Tergeý barysynda onyń zańsyz iemdengen birneshe nysany anyqtalǵan, solardyń biri - eńseli kottedj.
Másimov 2022 jylǵy Qańtar oqiǵasy kezinde ustaldy. Keiin oǵan «memleketke opasyzdyq jasady», «bilikti kúshpen basyp alýǵa árekettendi» degen aýyr aiyptar taǵylyp, 2023 jylǵy sáýirde 18 jylǵa sottaldy. Ol úkimge appeliatsiialyq shaǵym túsirgenimen, sot sheshimdi ózgertpedi. Byltyr jazda «raqymshylyqqa iligemin be» degen úmiti de aqtalmai, Toqaev «murttynyń» ótinishin maqul kórmedi.
