Sherzat Bolatty óltirý isi boıynsha ótip jatqan apelásıalyq sot otyrysyna jýrnalıser kirgizilmedi, dep habarlaıdy Dalanews.kz.

Olar sot zalynda oryn jetispeýin alǵa tartqan.

“Otyrysqa tek operatorlar jiberilgenimen, olardyń túsirilim júrgizýine aıyptalýshylardyń advokattary men týystary qarsy shyqty. Nátıjesinde sýdıa operatorlardy da zaldan shyǵarýǵa sheshim qabyldady”, — deıdi Nege.kz portaly.

Aıta keteıik, búgin Sherzat Bolatty óltirgenderdiń isi qaıtadan qaralyp jatyr.Bul týraly jábirlenýshi taraptyń advokaty Meıirman Shekeev habarlady.

Iaǵnı 18 tamyzda Qonaev qalasynda Sherzat Polatty óltirgeni úshin sottalǵandardyń apelásıalyq shaǵymy qaralady.

"Biz komandamyzben sotqa daıyndalyp otyrmyz. 18 tamyzda 8 sottalýshynyń apelásıalyq shaǵymy Almaty oblystyq sotynyń ǵımaratynda Qonaev qalasynda qaralady. Sonymen qatar, tóbeles bolǵan oqıǵa ornynda júrgen eki qyz – Elmıra Nurbekova men Dana Jaqsygeldi qatysty is, odan qalsa, kýáger Iýldash Rozybakıev pen Arlan Qazykenovke qatysty shyqqan birinshi satynyń jeke qaýlysyna keltirilgen Jaqsygeldi Dananyń jeke shaǵymy sol sot otyrysynda qaralady", - deıdi Shekeev.

Sherzat Bolattyń ólimi týraly ne belgili?

Eske salaıyq, byltyr Talǵarda jappaı tóbeles bolyp, saldarynan 16 jastaǵy jasóspirim Sherzat Bolat kóz jumdy.
Kámeletke tolmaǵan balany óltirý deregi boıynsha Almaty oblysynyń Polısıa departamenti qylmystyq is qozǵady. Sondaı-aq, olardyń úıi órtenip ketti.
Kóp uzamaı, ıaǵnı 9 jeltoqsanda marqum Sherzat Bolattyń aǵasy Nurǵanat Ǵaıypbaev ajal qushty. Polısıa departamenti aldyn ala derekter boıynsha ol sýısıd jasaǵanyn málimdedi. Oǵan dálel retinde polıseıler Nurǵanattyń týysyna messendjer arqyly jazǵan hatyn jarıa etti.
Al marqum Sherzattyń ákesi baýyry Nurǵanat Ǵaıypbaevty jer qoınyna tapsyrǵannan keıin buqaralyq aqparat quraldarymen kezdesýdi talap etip, kóshege shyqty. Alaıda araǵa uzaq ýaqyt salmaı Qarjaýbaı Nurymovty polısıa qyzmetkerleri ustap áketti. Artynsha Sherzat Bolattyń ápkesi qamaýǵa alyndy. Keıin Qarjaýbaı Nurymov 15 táýlikke ákimshilik qamaýǵa alyndy.
Jýyrda osy is boıynsha sot sheshimi shyqty. Tergeý málimetinshe, Sherzatqa pyshaq jaraqatyn salǵan basty aıyptalýshy Abzal Shynasyl 23 jylǵa bas bostandyǵynan aıyryldy. Ravıl Sakıev 20 jylǵa sottaldy.
Qalǵan aıyptalýshylar 7 jyldan 15 jylǵa deıin bas bostandyǵynan aıyryldy. Kámeletke tolmaǵan Dýman Ysqaq 1,5 jylǵa bas bostandyǵynan aıyryldy.