Interpol alǵash ret Qazaqstandaǵy “Aktivterdi qaitarý týraly” zańǵa ilikken tulǵalardyń birimen bailanysty aktivter boiynsha “Kúmis habarlama” taratty. Bul týraly Bas prokýratýra janyndaǵy Aktivterdi qaitarý komiteti málimdedi, dep habarlaidy Dalanews.kz.
“Aktivterdi izdeý jáne qaitarýdyń jańa tetigin engizý jónindegi pilottyq joba aiasynda Interpol Qazaqstan Respýblikasynyń alǵashqy “Kúmis habarlamasyn” jariialady. Qujat atalǵan zań sýbektileriniń birimen bailanysy bar tulǵanyń aktivteri jóninde aqparat alý úshin joldandy”, – delingen resmi habarlamada.
Komitettiń málimetinshe, 2024 jyly Qazaqstan Interpoldyń osy pilottyq jobasyn júzege asyratyn jumys tobynyń quramyna kirgen. Qazir bul bastamaǵa Ulybritaniia, Ispaniia, Italiia, Qatar, Qytai, Kýveit, Malta, Niderlandy, BAÁ, Polsha, Portýgaliia, Resei, Singapýr, AQSh, Frantsiia, Shvetsiia jáne ózge de elderdi qosqanda 50-den astam memleket qatysýda.
Jańa tetik Interpolǵa múshe 196 eldiń arasynda zańsyz iemdenilgen aktivter jóninde aqparat almasýǵa jol ashady. Onyń kómegimen qozǵalatyn jáne qozǵalmaityn múlik, qarjy qarajattary siiaqty aktivterdiń qozǵalysyn baqylaýǵa, olardyń naqty iesin anyqtap, zańsyz jolmen tabylǵanyn dáleldeýge múmkindik bar.
Buǵan deiin Interpol negizinen izdeýde júrgen adamdarǵa qatysty aqparat jinasa, endi zańsyz aktivterdiń taǵdyryna da erekshe kóńil bólinýde. Osylaisha kúmándi aktivterge álemniń kez kelgen jerinde quqyqtyq yqpal etýge jol ashylady.
Aktivterdi qaitarý komiteti halyqaralyq baǵyttaǵy jumystardy turaqty túrde kúsheitip, zańsyz shyǵarylǵan qarajatty elge qaitarýdyń tiimdi tetikterin jetildirip keledi.
