ينتەرپول العاش رەت قازاقستانداعى “اكتيۆتەردى قايتارۋ تۋرالى” زاڭعا ىلىككەن تۇلعالاردىڭ بىرىمەن بايلانىستى اكتيۆتەر بويىنشا “كۇمىس حابارلاما” تاراتتى. بۇل تۋرالى باس پروكۋراتۋرا جانىنداعى اكتيۆتەردى قايتارۋ كوميتەتى مالىمدەدى، دەپ حابارلايدى Dalanews.kz.
“اكتيۆتەردى ىزدەۋ جانە قايتارۋدىڭ جاڭا تەتىگىن ەنگىزۋ جونىندەگى پيلوتتىق جوبا اياسىندا ينتەرپول قازاقستان رەسپۋبليكاسىنىڭ العاشقى “كۇمىس حابارلاماسىن” جاريالادى. قۇجات اتالعان زاڭ سۋبەكتىلەرىنىڭ بىرىمەن بايلانىسى بار تۇلعانىڭ اكتيۆتەرى جونىندە اقپارات الۋ ءۇشىن جولداندى”، – دەلىنگەن رەسمي حابارلامادا.
كوميتەتتىڭ مالىمەتىنشە، 2024 جىلى قازاقستان ينتەرپولدىڭ وسى پيلوتتىق جوباسىن جۇزەگە اسىراتىن جۇمىس توبىنىڭ قۇرامىنا كىرگەن. ءقازىر بۇل باستاماعا ۇلىبريتانيا، يسپانيا، يتاليا، قاتار، جۇڭگو، كۋۆەيت، مالتا، نيدەرلاندى، ءباا، پولشا، پورتۋگاليا، رەسەي، سينگاپۋر، اقش، فرانسيا، شۆەسيا جانە وزگە دە ەلدەردى قوسقاندا 50-دەن استام مەملەكەت قاتىسۋدا.
جاڭا تەتىك ينتەرپولعا مۇشە 196 ەلدىڭ اراسىندا زاڭسىز يەمدەنىلگەن اكتيۆتەر جونىندە اقپارات الماسۋعا جول اشادى. ونىڭ كومەگىمەن قوزعالاتىن جانە قوزعالمايتىن مۇلىك، قارجى قاراجاتتارى سياقتى اكتيۆتەردىڭ قوزعالىسىن باقىلاۋعا، ولاردىڭ ناقتى يەسىن انىقتاپ، زاڭسىز جولمەن تابىلعانىن دالەلدەۋگە مۇمكىندىك بار.
بۇعان دەيىن ينتەرپول نەگىزىنەن ىزدەۋدە جۇرگەن ادامدارعا قاتىستى اقپارات جيناسا، ەندى زاڭسىز اكتيۆتەردىڭ تاعدىرىنا دا ەرەكشە كوڭىل بولىنۋدە. وسىلايشا كۇماندى اكتيۆتەرگە الەمنىڭ كەز كەلگەن جەرىندە قۇقىقتىق ىقپال ەتۋگە جول اشىلادى.
اكتيۆتەردى قايتارۋ كوميتەتى حالىقارالىق باعىتتاعى جۇمىستاردى تۇراقتى تۇردە كۇشەيتىپ، زاڭسىز شىعارىلعان قاراجاتتى ەلگە قايتارۋدىڭ ءتيىمدى تەتىكتەرىن جەتىلدىرىپ كەلەدى.
