2024 jyly Jetisý oblysynda mal basy 2022 jylmen salystyrǵanda 8,1%-ǵa artty, al biylǵy jyldyń birinshi jartysynda mal sany shamamen 2,7 million basqa jetti. Atalǵan kezeńde aýyl sharýashylyǵy ónimderiniń óndirisi 4,2%-ǵa ulǵaidy. 2025 jyldyń alǵashqy 6 aiynda 46,6 myń tonna et pen 104,2 myń tonna sút óndirildi,- dep habarlaidy Dalanews.kz
Biyl egis alqaptaryn ártaraptandyrý nátijesinde óńirde aýyl sharýashylyǵy daqyldary 510,7 myń gektarǵa sebildi. Ásirese qant óndirisiniń damýyna erekshe kóńil bólinýde.
Ótken jyly oblysta qant qyzylshasynan rekordtyq ónimi jinalyp, óńirdegi eki qant zaýyty 67 myń tonna qant óndirdi. Biyl tátti túbirdiń egis alqaby 12,1 myń gektar, boljam boiynsha osy alqaptan 540 myń tonna qyzylsha jinalady dep kútilýde, odan jalpy 78 myń tonna qant óndirilýi tiis, onyń 54 myń tonnasy qyzylshadan, 24 myń tonnasy qamys quraǵynan alynady. Atap ótsek, qyzylsha óndirisi salasynda 593 sharýashylyq jumys isteidi, onda shamamen 4800 adam eńbek etýde.
– Jetisý oblysynda qant qyzylshasynyń egis alqaptarynyń kólemi jyldan jylǵa ulǵaitylyp keledi. Qyzylsha ósirýge den qoiyp, alqapty ulaityp jatqandardyń qatarynda biz, Aqsý aýdanynyń sharýashylyqtary da barmyz. Qyzylsha ósirý – eńbekqorlyqty qajet etetin jumys bolǵanymen, búginde ony ósirý óte tiimdi bolyp otyr. Bul daqyldyń tuqymyna beriletin sýbsidiia kólemi artty, zaýyttar da satyp alý baǵasyn kóterdi. Aqsýdaǵy qant zaýytynyń ónim qabyldaý kólemin ulǵaitýy da jaǵdaidy ońaltýǵa septigin tigizdi. Biylǵy maýsymda ár gektardan 100 tonnadan astam ónim jinaimyz dep josparlap otyrmyz, bizdiń sharýashylyqta buryn-sońdy mundai tolymdy ónim bolmaǵan edi. Bul biz úshin – naǵyz rekord. Ózim qant qyzylshasyn ósirýmen 2018 jyldan beri ainalysyp kelemin, osy rette aitarym – tehnologiialyq protsesterdi qatań saqtap, alqapqa jaqsy kútim jasasa, joǵary nátijege qol jetkizýge ábden bolady, – deidi Aqsý aýdanyna qarasty «Janys-K» JShS sharýa qojalyǵynyń direktory Ǵalbiiat Samarqanuly.
Egis alqaptaryn sýarmaly sýmen qamtamasyz etý máselesi de jiti baqylaýda.
Óńirde irrigatsiialyq júielerdi qalpyna keltirýge baǵyttalǵan 11 joba júzege asyrylýda. Olardyń ishinde byltyr 5 nysandaǵy jumystar aiaqtalyp, 4,8 myń gektar sýarmaly jer qaita ainalymǵa qosyldy. Qalǵan 6 jobany iske asyrý nátijesinde 5,3 myń gektar jer ainalymǵa engizilip, jalpy 30,9 myń gektar sýarmaly alqap qalpyna keltirilmek.
Jalpy, 2022-2024 jyldar aralyǵynda oblys aýmaǵynda paidalanylmai jatqan 1,2 mln gektar aýyl sharýashylyǵy jeri memleket menshigine qaitaryldy, onyń 712,0 myń gektary aýyl sharýashylyǵy ainalymyna engizildi.
Sondai-aq 2025 jyldyń birinshi jartysynda Jetisý oblysynda ekonomikanyń negizgi salalarynda, sonyń ishinde aýyl sharýashylyǵynda da oń dinamika saqtalyp otyrǵanyn atap ótken jón. Agroónerkásiptik keshendi qoldaýǵa biyl 40,7 mlrd teńge baǵyttaldy, onyń 23,1 mlrd teńgesi nemese 56,8%-y sýbsidiia túrinde bólindi.
