2024 جىلى جەتىسۋ وبلىسىندا مال باسى 2022 جىلمەن سالىستىرعاندا 8،1%-عا ارتتى، ال بيىلعى جىلدىڭ ءبىرىنشى جارتىسىندا مال سانى شامامەن 2،7 ميلليون باسقا جەتتى. اتالعان كەزەڭدە اۋىل شارۋاشىلىعى ونىمدەرىنىڭ ءوندىرىسى 4،2%-عا ۇلعايدى. 2025 جىلدىڭ العاشقى 6 ايىندا 46،6 مىڭ توننا ەت پەن 104،2 مىڭ توننا ءسۇت ءوندىرىلدى،- دەپ حابارلايدى Dalanews.kz
بيىل ەگىس القاپتارىن ءارتاراپتاندىرۋ ناتيجەسىندە وڭىردە اۋىل شارۋاشىلىعى داقىلدارى 510،7 مىڭ گەكتارعا سەبىلدى. اسىرەسە قانت ءوندىرىسىنىڭ دامۋىنا ەرەكشە كوڭىل بولىنۋدە.
وتكەن جىلى وبلىستا قانت قىزىلشاسىنان رەكوردتىق ءونىمى جينالىپ، وڭىردەگى ەكى قانت زاۋىتى 67 مىڭ توننا قانت ءوندىردى. بيىل ءتاتتى ءتۇبىردىڭ ەگىس القابى 12،1 مىڭ گەكتار، بولجام بويىنشا وسى القاپتان 540 مىڭ توننا قىزىلشا جينالادى دەپ كۇتىلۋدە، ودان جالپى 78 مىڭ توننا قانت ءوندىرىلۋى ءتيىس، ونىڭ 54 مىڭ تونناسى قىزىلشادان، 24 مىڭ تونناسى قامىس قۇراعىنان الىنادى. اتاپ وتسەك، قىزىلشا ءوندىرىسى سالاسىندا 593 شارۋاشىلىق جۇمىس ىستەيدى، وندا شامامەن 4800 ادام ەڭبەك ەتۋدە.
– جەتىسۋ وبلىسىندا قانت قىزىلشاسىنىڭ ەگىس القاپتارىنىڭ كولەمى جىلدان جىلعا ۇلعايتىلىپ كەلەدى. قىزىلشا وسىرۋگە دەن قويىپ، القاپتى ۇلايتىپ جاتقانداردىڭ قاتارىندا ءبىز، اقسۋ اۋدانىنىڭ شارۋاشىلىقتارى دا بارمىز. قىزىلشا ءوسىرۋ – ەڭبەكقورلىقتى قاجەت ەتەتىن جۇمىس بولعانىمەن، بۇگىندە ونى ءوسىرۋ وتە ءتيىمدى بولىپ وتىر. بۇل داقىلدىڭ تۇقىمىنا بەرىلەتىن سۋبسيديا كولەمى ارتتى، زاۋىتتار دا ساتىپ الۋ باعاسىن كوتەردى. اقسۋداعى قانت زاۋىتىنىڭ ءونىم قابىلداۋ كولەمىن ۇلعايتۋى دا جاعدايدى وڭالتۋعا سەپتىگىن تيگىزدى. بيىلعى ماۋسىمدا ءار گەكتاردان 100 توننادان استام ءونىم جينايمىز دەپ جوسپارلاپ وتىرمىز، ءبىزدىڭ شارۋاشىلىقتا بۇرىن-سوڭدى مۇنداي تولىمدى ءونىم بولماعان ەدى. بۇل ءبىز ءۇشىن – ناعىز رەكورد. ءوزىم قانت قىزىلشاسىن وسىرۋمەن 2018 جىلدان بەرى اينالىسىپ كەلەمىن، وسى رەتتە ايتارىم – تەحنولوگيالىق پروسەستەردى قاتاڭ ساقتاپ، القاپقا جاقسى كۇتىم جاساسا، جوعارى ناتيجەگە قول جەتكىزۋگە ابدەن بولادى، – دەيدى اقسۋ اۋدانىنا قاراستى «جانىس-ك» ج ش س شارۋا قوجالىعىنىڭ ديرەكتورى عالبيات سامارقان ۇلى.
ەگىس القاپتارىن سۋارمالى سۋمەن قامتاماسىز ەتۋ ماسەلەسى دە ءجىتى باقىلاۋدا.
وڭىردە يرريگاسيالىق جۇيەلەردى قالپىنا كەلتىرۋگە باعىتتالعان 11 جوبا جۇزەگە اسىرىلۋدا. ولاردىڭ ىشىندە بىلتىر 5 نىسانداعى جۇمىستار اياقتالىپ، 4،8 مىڭ گەكتار سۋارمالى جەر قايتا اينالىمعا قوسىلدى. قالعان 6 جوبانى ىسكە اسىرۋ ناتيجەسىندە 5،3 مىڭ گەكتار جەر اينالىمعا ەنگىزىلىپ، جالپى 30،9 مىڭ گەكتار سۋارمالى القاپ قالپىنا كەلتىرىلمەك.
جالپى، 2022-2024 جىلدار ارالىعىندا وبلىس اۋماعىندا پايدالانىلماي جاتقان 1،2 ملن گەكتار اۋىل شارۋاشىلىعى جەرى مەملەكەت مەنشىگىنە قايتارىلدى، ونىڭ 712،0 مىڭ گەكتارى اۋىل شارۋاشىلىعى اينالىمىنا ەنگىزىلدى.
سونداي-اق 2025 جىلدىڭ ءبىرىنشى جارتىسىندا جەتىسۋ وبلىسىندا ەكونوميكانىڭ نەگىزگى سالالارىندا، سونىڭ ىشىندە اۋىل شارۋاشىلىعىندا دا وڭ ديناميكا ساقتالىپ وتىرعانىن اتاپ وتكەن ءجون. اگروونەركاسىپتىك كەشەندى قولداۋعا بيىل 40،7 ملرد تەڭگە باعىتتالدى، ونىڭ 23،1 ملرد تەڭگەسى نەمەسە 56،8%-ى سۋبسيديا تۇرىندە ءبولىندى.
