Memleket basshysy Qasym-Jomart Toqaev Qazaqstan halqyna Joldaýynda óńirlerge ınvestısıa tartý máselesine toqtalyp, arnaıy ekonomıkalyq aımaqtardyń (AEA) jumysyn túbegeıli qaıta qaraý qajettigin aıtty, dep habarlaıdy Dalanews.kz.
Prezıdenttiń aıtýynsha, AEA el ekonomıkasynda mańyzdy ról atqarýǵa tıis bolǵanymen, olardyń kóbiniń jumysy áli de mardymsyz.
«Úkimet arnaıy ekonomıkalyq aımaqtardyń tıimdiligin arttyrý úshin tereń saraptama jasap, túbegeıli sharalar qabyldaýǵa daıyn bolýy kerek. Arnaıy aımaqtardy basqarýǵa jeke kompanıalardy, qajet bolsa, sheteldik ınvestorlardy tartýǵa bolady», – dedi Toqaev.
Sondaı-aq Memleket basshysy áleýmettik-kásipkerlik korporasıalardyń qazirgi jumysyna syn aıtty. Onyń pikirinshe, bul uıymdar aımaqtyq ekonomıkany ilgeriletýdiń ornyna komýnaldyq múlikti basqarý men usaq jobalarǵa ǵana nazar aýdaryp otyr.
«Úkimet osyndaı korporasıalardy tolyqqandy damý ınstıtýtyna aınaldyrýy tıis», – dep tapsyrma berdi Prezıdent.
Qasym-Jomart Toqaev ınvestısıa tartý tek ortalyq organdardyń emes, jergilikti bıliktiń de basty mindeti ekenin atap ótti.
«Ákimderdiń aımaqtaǵy ınvestısıalyq ahýalǵa tikeleı jaýapkershiligin belgileý kerek», – dedi ol.
Sonymen qatar Strategıalyq josparlaý jáne reformalar agenttigine aımaqtardyń ınvestısıalyq tartymdylyq ındeksin engizý tapsyryldy. Bul iske táýelsiz sarapshylardy tartý múmkindigi de qarastyrylmaq.
Prezıdent óz sózinde ınflásıa máselesine de toqtaldy. Onyń aıtýynsha, joǵary baǵa ósimi ekonomıkalyq kórsetkishter men halyqtyń tabysyn «jutyp jatyr».
«Bul másele kóptegen memleketke ortaq, biraq bizde aıryqsha sezilip otyr. Qıyndyqtar keshe ǵana paıda bolǵan joq. Sheshim qabyldaý úshin álemdegi ozyq tájirıbelerge súıenip, qajet bolǵan jaǵdaıda halyqqa unaı bermeıtin sharalarǵa barýǵa da daıyn bolýymyz kerek», – dedi Toqaev.
Osy rette Memleket basshysy Úkimet pen Ulttyq bankke birtutas komanda retinde jumys isteýdi tapsyrdy.
«Qazir árkim kórpeni ózine qaraı tartatyn kez emes», – dep qadap aıtty Prezıdent.
