Prezident Qasym-Jomart Toqaev Qazaqstan halqyna Joldaýynda Alatau City jobasynyń mán-mańyzyna toqtalyp, ony eldiń jańa damý draiverine ainaldyrý qajettigin atap ótti, dep habarlaidy Dalanews.kz.
«Qarqyndy ósip kele jatqan kóptegen memlekette damý kóshiniń basynda júretin qalalar investitsiialar men tehnologiialardy ózine tartatyn poliýske ainalǵan. Alataý qalasy elimizdiń jańa iskerlik jáne innovatsiialyq ortalyǵy bolýǵa tiis», – dedi Prezident.
Memleket basshysynyń aitýynsha, jalpyulttyq mańyzy bar bul megajoba úshin arnaiy jer bólinip, bastapqy josparlaý jumystary aiaqtalǵan. Qalaǵa qajetti infraqurylymnyń negizgi jelileri de tartylǵan.
Sonymen qatar Toqaev jýyrdaǵy Qytai sapary aiasynda jasalǵan kelisimderge toqtaldy.
«Shenchjen jahandyq tehnopolisin salýǵa qatysqan jetekshi kompaniialardyń biri Alatau City jobasyn júzege asyrýǵa tikelei atsalysady», – dedi ol.
Prezidenttiń tapsyrmasyna sáikes, endi jobaǵa myqty institýtsionaldyq negizder qalyptastyrý qajet. Osyǵan orai qalaǵa arnaiy mártebe berý týraly Jarlyqty on kún ishinde ázirleý júkteldi. Budan bólek, jarty jyldan aspaityn merzimde qalany basqarý tártibi, qarjylyq modeli jáne ózge de tetikterdi aiqyndaityn jeke zań qabyldanatyn bolady.
«Arnaiy quqyqtyq mártebe – qalaǵa beriletin artyqshylyq emes, jobanyń qaǵaz júzinde qalyp qoimai, naqty iske asýyna qajetti qural», – dep túsindirdi Toqaev.
Alatau City elimizdegi alǵashqy tolyq tsifrlanǵan qala retinde Smart City tehnologiialaryn engizýdi kózdeidi. Munda zamanaýi innovatsiialyq sheshimder qoldanylady, tipti taýarlar men qyzmetter úshin kriptovaliýtamen tóleý múmkindigi qarastyrylmaq.
«Bul qala Qazaqstannyń keleshektegi kelbetin tanytpaq. Onda tehnologiialyq órleýge jáne ómir súrýge barynsha qolaily jaǵdai úilesim tabýy qajet», – dep túiindedi Memleket basshysy.
