Memleket basshysy Qasym-Jomart Toqaev tsifrlyq aktivterdiń tolyqqandy ekojúiesin tezirek qalyptastyrý kerek ekenin aitty, dep habarlaidy Dalanews.kz.
"Ekonomikamyzdyń joǵary tehnologiialyq salalaryna bir milliard dollarǵa deiin investitsiia tartý týraly baǵdarlama ázirleý qajet. Ony Úkimet Ulttyq bankpen birlesip daiyndaýǵa tiis Jańa investitsiialyq kezeńdi oidaǵydai bastaý mańyzdy. Ekinshi dárejeli bankter naqty sektorǵa belsendi túrde qarjy salýy kerek. Bul másele qoǵamda baiaǵydan qyzý talqylanyp jatyr. Osy jumysty kóp sozbai qolǵa alý qajet. Qazaqstandaǵy bankterdiń aktivteri men qarajaty damyǵan elderge qaraǵanda orta eseppen birneshe ese kóp paida ákeledi. Sebebi bizdiń bankter ekonomikaǵa nesie bergennen góri qarjylyq táýekeli tómen baǵyttarǵa aqsha salǵandy jón kóredi. Osy máseleni depýtattar, sarapshylar únemi kóterip júr. Ulttyq bank pen Úkimet bankterdiń aqshasyn ekonomikaǵa barynsha tartýdyń tiimdi tásilderin tabýy qajet. Endi bul máseleni sozýǵa bolmaidy, shuǵyl sheshý qajet. Bankter týraly zań qabyldaý osy baǵyttaǵy mańyzdy qadam bolmaq", - dedi Toqaev.
Memleket basshysynyń pikirinshe, bul zańda ekonomikanyń suranysy men tehnologiialyq ózgerister eskerilýi qajet.
"Qujatta básekeni kúsheitý, naryqqa jańa qatysýshylardy tartý, qarjy júiesindegi tehnologiialardy ilgeriletý jáne tsifrlyq aktivter ainalymyn yryqtandyrý máseleleri qamtylýy kerek. Úkimet Qarjy naryǵyn retteý agenttigimen birlesip, zań jobasyn jan-jaqty pysyqtaýy qajet. Depýtattardan osy zańdy jyl sońyna deiin qabyldaýdy suraimyn. Tsifrlyq aktivterdiń tolyqqandy ekojúiesin tezirek qalyptastyrǵan jón. Tsifrlyq teńgeniń engizilýi bul jumysqa septigin tigizip jatyr. Qazirgi tańda jobalardy Ulttyq qor esebinen qarjylandyrý kezinde tsifrlyq teńgeni qoldanyp júrmiz. Endi onyń qoldaný aiasyn odan ári keńeitý qajet. Tsifrlyq teńgeni respýblikalyq jáne jergilikti biýdjette, memlekettik holdingterdiń biýdjetinde paidalanýǵa bolady.
Qazirgi zamannyń talabyn eskere otyryp, kriptoaktivterge basa nazar aýdarý kerek. Ulttyq banktiń investitsiialyq korporatsiiasy negizinde Tsifrlyq aktivterdiń memlekettik qoryn qurǵan jón. Bul qurylymda jańa tsifrlyq qarjy júiesindegi bolashaǵy zor aktivterden quralǵan strategiialyq kriptorezerv jinaqtalady. Jappai tsifrlandyrýdyń, sonyń ishinde bank salasyn tsifrlandyrý isiniń paidasy kóp ekeni sózsiz. Biraq, onyń qaýip-qateri de az emes. Sońǵy jyldary onlain-alaiaqtyq memlekettiń jáne azamattardyń qarjylyq qaýipsizdigine úlken nuqsan keltirip jatyr. Sondyqtan, kiber-qylmyspen kúresý úshin antifrod ortalyǵy quryldy. Biometriialyq anyqtaý júiesi engizildi. Bankterdiń, mikro-qarjy uiymdary men bailanys operatorlarynyń jaýapkershiligi kúsheidi. Degenmen, bul máselege únemi jiti nazar aýdarý qajet. Quzyrly organdardyń jumysyn udaiy jetildirip otyrǵan jón. Kiber-qylmystardyń aldyn alýǵa múmkindik beretin barynsha intellektýaldy júie qurý kerek. Qajet bolsa, tiisti zańǵa jáne quqyq qorǵaý organdarynyń qyzmetine ózgerister engizgen jón", - dedi Toqaev.
