«Ádilet» partiiasy fraktsiiasy Qazaqstan tarihyna qatysty jalǵan ári burmalanǵan aqparattyń taralýyna qarsy júieli tetik qurýdy usyndy, dep habarlaidy Dala News.
Májilis depýtaty Sholpan Karinova Mádeniet jáne aqparat ministrine joldaǵan depýtattyq saýalynda qazirgi tańda tarihi sana tek oqýlyqtar men ǵylymi eńbekter arqyly qalyptaspaitynyn aitty.
Onyń sózinshe, jastar Qazaqstan tarihy týraly aqparatty TikTok, Instagram jáne YouTube siiaqty tsifrlyq platformalardan jii alady. Alaida bul keńistikte derekkózi kúmándi, ǵylymi negizi joq jáne burmalanǵan tarihi kontent tez taralady.
«Ulttyń jadyn kúmándi derekpen, burmalanǵan málimetpen ýlaýǵa bolmaidy. Mundai áreket ótken kúnge degen senimdi, keleshekke degen úmitti álsiretedi», – dedi depýtat Memleket basshysynyń Quryltai sessiiasynyń ashylýynda aitqan sózin keltirip.
Karinovanyń aitýynsha, mundai aqparatqa der kezinde kásibi túrde jaýap berip, qoǵamǵa naqty ári senimdi derek usynatyn júie qajet.
Depýtat aqparattyq saiasat tek memlekettik bastamalardy jariialaýmen shektelmeýi kerek ekenin atap ótti. Onyń pikirinshe, azamattarǵa reformalardyń maqsaty men nátijesin túsindiretin, sondai-aq qoǵamdaǵy ózgeristerdi qarapaiym ári túsinikti tilmen jetkizetin jýrnalistika qajet.
«Aqparatty jai jariialaý jetkiliksiz. Ony túsindirý de mańyzdy», – dedi Sholpan Karinova.
Osyǵan bailanysty «Ádilet» fraktsiiasy Úkimetke ulttyq tarihi sanany memlekettik aqparattyq saiasattyń basym baǵyttarynyń biri retinde aiqyndaýdy usyndy.
Sonymen qatar Qazaqstan tarihyna qatysty kontenttiń ǵylymi negizdiligi men derektiligin qamtamasyz etetin júie qalyptastyrý, tarihi jad pen ulttyq qundylyqtardy dáripteitin zamanaýi media-jobalardy qoldaý usynyldy.
Fraktsiia TikTok, Instagram jáne YouTube platformalarynda Qazaqstan tarihyn zamanaýi ári túsinikti formatta nasihattaityn jobalardy iske qosýdy jáne tarihi taqyryptaǵy jalǵan aqparatqa jedel jaýap beretin tiimdi tetik qalyptastyrýdy surady.
