Qazaqstan álemde jan basyna shaqqandaǵy ajyrasý sany boıynsha aldyńǵy oryndardyń birinde tur, dep habarlaıdy Dalanews.kz.

Internet-marketolog Erlan Muqashev buǵan basty sebep – áleýmettik jeliler ekenin aıtady. Onyń pikirinshe, Instagram-daǵy jyltyraq ómirge qarap, adamdar óz tirshiligin tómen baǵalap, kóńili qalýda.

– Qazaqstan nege álemde ajyrasý boıynsha ekinshi orynda tur? Qarjy qıynshylyǵy ma, álde opasyzdyq pa dep oılaısyń ba? Joq, basty sebep – áleýmettik jeliler. Rılstardan bireýdiń kólik syılap jatqanyn, Parıjde tańǵy as iship otyrǵanyn, gúl japyraqtarynda shomylyp júrgenin kóresiń. Al óz ómiriń – kúndelikti kúıbeń tirshilik: balanyń mazasyzdyǵy, kúıip ketken keshki as. Salystyrasyń. Salystyrǵan saıyn, óz ómirińniń qadirin túsire bastaısyń.

Sol kezde renish, ókpe, kóńil tolmaýshylyq paıda bolady. Biraq janynda júrgen adam – bloger emes, ol shyn máninde seni úshin tyrysyp júrgen jan. Ol laık úshin emes, sen úshin ómir súrip júr. Al áleýmettik jeli – ol shyndyq emes, jaı ǵana ádemi kadrlar. Bul – shoý. Sondyqtan otbasyńdy bireýdiń storısimen ólsheme. Lentany jaýyp, qasyńda júrgen adamǵa nazar aýdar, – dep keńes beredi sarapshy.

Eske salaıyq, buǵan deıin Májilis depýtaty Ardaq Nazarovtyń ajyrasý kórsetkishterine qatty alańdaıtynyn aıtyp, ajyrasqan azamattarǵa tabys salyǵyn kóterý usynysyn aıtýy qoǵamda úlken rezonans týdyrǵan edi. Bul usynysty saıasattanýshy Ǵazız Ábishev óziniń saraptamalyq jazbasynda synǵa alyp, ony bizdiń qoǵamdaǵy «mahabbatqa májbúrleý mádenıetiniń» taǵy bir kórinisi retinde sıpattaǵan bolatyn. 

Sarapshy mundaı tásildiń tek salyq saıasaty arqyly emes, qalyńdyq urlaý, burynǵy áıeldi ańdý, tilge qysym jasaý, radıkaldy dinı úgit, tipti últralıberaldyq ıdeologıadaǵy shekten shyǵý formasynda da kórinis tabatynyn atap ótti. Onyń aıtýynsha, bul qubylystardyń barlyǵynda da adamdardan óz erkimen jaqsy kórýi talap etiledi. Nátıjesinde mahabbatty kúshtep nyǵaıtamyz-mys. “Unasa da, unamasa da, tóze ber, sulýym” degen ustanym sol ǵasyrlar qoınaýynan jetken mádenı shtamp.

Sonymen qatar,Ábishev Ardaq Nazarov ajyrasqan adamdardy jazalaý arqyly otbasyn saqtap qalýdy emes, qazaq qoǵamyndaǵy otbasy ınstıtýtynyń damýyn tejeıtin qadam usynyp otyr dep esepteıdi. Mundaı májbúrleý – otbasyny saqtaý emes, kerisinshe, onyń tabıǵı damýyn tejeý.