"Palestinadaǵy soǵystan zardap shekken halyqqa kómek beremiz" degen nietpen Qazaqstan halqy jinaǵan 200 mln teńge iz-tússiz joǵalǵan. Qomaqty qarjy belgili bloger ári qoǵam belsendisi Perizat Qairat basqaratyn qaiyrymdylyq qoryna senip tapsyrylǵanymen, dittegen jerine jetpegeni belgili boldy. Asar-Ume qaiyrymdylyq qorynyń prezidenti Ashat Nurmashev YouTube-tegi TalkLike jobasynda osy máselege qatysty buryn jariialanbaǵan jaittardyń betin ashyp, oqiǵanyń qalai órbigenin aityp berdi, dep habarlaidy Dalanews.kz.
Asar-Ume qaiyrymdylyq qorynyń prezidenti Ashat Nurmashev Palestinadaǵy halyqqa kómekteskisi keletin el azamattarynyń ótinishinen keiin qor qyzmetkerleri men quryltaishylaryn jinap, keńes ótkizgenin aitady. Keńeste bul iske tájiribeleri joq ekeni, sondyqtan kómekti mejeli jerge jetkizý úshin senimdi seriktes tabý kerektigi sóz bolady. Osy kezde áleýmettik jelide belsendiligimen tanymal bolǵan volonter Perizat Qairat bailanysqa shyǵyp, óz qorynyń Birikken Arab Ámirlikterindegi arnaiy gýmanitarlyq habta akkreditatsiiasy bar ekenin aityp sendirgen.
Ashat Nurmashevtiń aitýynsha, Asar-Ume qory bir ai boiy Perizat Qairattyń málimdemesin muqiiat teksergen. Perizat olardy BAÁ men Palestina elshilikteriniń ókilderimen tanystyryp, Gaza sektoryna jetkiziletin kómekti uiymdastyrýǵa tolyq múmkindigi bar ekenine ilandyrǵan.
2023 jyldyń 10 qarashasynda qor resmi túrde halyqtan qarjy jinaýdy bastap, nátijesinde 293 million teńge jinalady. Kómekti Gaza sektoryna jiberý úshin Perizat Qairatpen resmi kelisimshart jasalyp, 200 mln teńge onyń shotyna aýdarylǵan. Kelisimshartqa sai Perizat Qairat jeltoqsan aiynda atqarylǵan jumys boiynsha tolyq esep berýge mindettelgen. Alaida esepti olar sol kúii kórmegen.
Ashat Nurmashevtiń aitýynsha, qor Perizat Qairattan esep berýdi talap etip, resmi hat joldaǵan. Buǵan jaýap retinde Perizat mór basylǵan, biraq naqty dálelderi joq, ústirt bir qaǵazdy usynǵan. Qor ony qabyldaýdan bas tartyp, aqpan aiynda naqty qarjy aýdarymdarynyń túbirtekteri men rastaityn qujattardy talap etedi.
Aqyrynda Perizat aqpan aiynda tiisti qarjylyq qujattardy usynǵannan keiin ǵana másele sheshilgendei kórinedi. Biraq, tergeý barysynda bul qujattardyń barlyǵy jalǵan ekeni belgili bolǵan. Ashat Nurmashev budan sot barysynda bir-aq habardar bolady.
"Shyn máninde, 200 mln teńgeden eshteńe túspegen, bálkim 200 dollardai ǵana aýdarylǵan shyǵar. Al biz qolǵa tigen esep durys dep júrdik. Perizat bizden qalǵan 93 mln teńgeni de aýdarýdy talap etti. Biz oǵan esepti tolyq qabyldamai, aqshany bermeitinimizdi naqty aittyq. Keiin ózimiz elshilik ókilderimen tikelei bailanys ornatyp, qarjyny sol arqyly Palestinaǵa aýdardyq", – deidi Ashat Nurmashev.
Onyń aitýynsha, dál sol ýaqytta elshilikke belgisiz bireýler "Asar-Ume qory halyqtan jinalǵan aqshany óz qaltalaryna basyp aldy" degen jalǵan aqparat tarata bastaǵan. Ashat Nurmashev muny Perizat Qairattyń ainalasyndaǵy adamdardan kóredi.
Qazirgi tańda sot tergeýi áli júrip jatyr. Nurmashevtiń aitýynsha, ol halyqtyń amanatyna qiianat jasalǵanyna, osynsha ýaqyt boiy aldanǵanyna áli kúnge deiin sene alar emes. Biraq, shyndyqtyń beti ashylǵan saiyn, bul iske qatysty kúmáni qalmaǵanyn da moiyndaidy.
