"پالەستيناداعى سوعىستان زارداپ شەككەن حالىققا كٶمەك بەرەمٸز" دەگەن نيەتپەن قازاقستان حالقى جيناعان 200 ملن تەڭگە ٸز-تٷسسٸز جوعالعان. قوماقتى قارجى بەلگٸلٸ بلوگەر ەرٸ قوعام بەلسەندٸسٸ پەريزات قايرات باسقاراتىن قايىرىمدىلىق قورىنا سەنٸپ تاپسىرىلعانىمەن, دٸتتەگەن جەرٸنە جەتپەگەنٸ بەلگٸلٸ بولدى. Asar-Ume قايىرىمدىلىق قورىنىڭ پرەزيدەنتٸ اسحات نۇرماشەۆ YouTube-تەگٸ TalkLike جوباسىندا وسى مەسەلەگە قاتىستى بۇرىن جارييالانباعان جايتتاردىڭ بەتٸن اشىپ, وقيعانىڭ قالاي ٶربٸگەنٸن ايتىپ بەردٸ, دەپ حابارلايدى Dalanews.kz.
Asar-Ume قايىرىمدىلىق قورىنىڭ پرەزيدەنتٸ اسحات نۇرماشەۆ پالەستيناداعى حالىققا كٶمەكتەسكٸسٸ كەلەتٸن ەل ازاماتتارىنىڭ ٶتٸنٸشٸنەن كەيٸن قور قىزمەتكەرلەرٸ مەن قۇرىلتايشىلارىن جيناپ, كەڭەس ٶتكٸزگەنٸن ايتادى. كەڭەستە بۇل ٸسكە تەجٸريبەلەرٸ جوق ەكەنٸ, سوندىقتان كٶمەكتٸ مەجەلٸ جەرگە جەتكٸزۋ ٷشٸن سەنٸمدٸ سەرٸكتەس تابۋ كەرەكتٸگٸ سٶز بولادى. وسى كەزدە ەلەۋمەتتٸك جەلٸدە بەلسەندٸلٸگٸمەن تانىمال بولعان ۆولونتەر پەريزات قايرات بايلانىسقا شىعىپ, ٶز قورىنىڭ بٸرٸككەن اراب ەمٸرلٸكتەرٸندەگٸ ارنايى گۋمانيتارلىق حابتا اككرەديتاتسيياسى بار ەكەنٸن ايتىپ سەندٸرگەن.
اسحات نۇرماشەۆتٸڭ ايتۋىنشا, Asar-Ume قورى بٸر اي بويى پەريزات قايراتتىڭ مەلٸمدەمەسٸن مۇقييات تەكسەرگەن. پەريزات ولاردى باە مەن پالەستينا ەلشٸلٸكتەرٸنٸڭ ٶكٸلدەرٸمەن تانىستىرىپ, گازا سەكتورىنا جەتكٸزٸلەتٸن كٶمەكتٸ ۇيىمداستىرۋعا تولىق مٷمكٸندٸگٸ بار ەكەنٸنە يلاندىرعان.
2023 جىلدىڭ 10 قاراشاسىندا قور رەسمي تٷردە حالىقتان قارجى جيناۋدى باستاپ, نەتيجەسٸندە 293 ميلليون تەڭگە جينالادى. كٶمەكتٸ گازا سەكتورىنا جٸبەرۋ ٷشٸن پەريزات قايراتپەن رەسمي كەلٸسٸمشارت جاسالىپ, 200 ملن تەڭگە ونىڭ شوتىنا اۋدارىلعان. كەلٸسٸمشارتقا ساي پەريزات قايرات جەلتوقسان ايىندا اتقارىلعان جۇمىس بويىنشا تولىق ەسەپ بەرۋگە مٸندەتتەلگەن. الايدا ەسەپتٸ ولار سول كٷيٸ كٶرمەگەن.
اسحات نۇرماشەۆتٸڭ ايتۋىنشا, قور پەريزات قايراتتان ەسەپ بەرۋدٸ تالاپ ەتٸپ, رەسمي حات جولداعان. بۇعان جاۋاپ رەتٸندە پەريزات مٶر باسىلعان, بٸراق ناقتى دەلەلدەرٸ جوق, ٷستٸرت بٸر قاعازدى ۇسىنعان. قور ونى قابىلداۋدان باس تارتىپ, اقپان ايىندا ناقتى قارجى اۋدارىمدارىنىڭ تٷبٸرتەكتەرٸ مەن راستايتىن قۇجاتتاردى تالاپ ەتەدٸ.
اقىرىندا پەريزات اقپان ايىندا تيٸستٸ قارجىلىق قۇجاتتاردى ۇسىنعاننان كەيٸن عانا مەسەلە شەشٸلگەندەي كٶرٸنەدٸ. بٸراق, تەرگەۋ بارىسىندا بۇل قۇجاتتاردىڭ بارلىعى جالعان ەكەنٸ بەلگٸلٸ بولعان. اسحات نۇرماشەۆ بۇدان سوت بارىسىندا بٸر-اق حاباردار بولادى.
"شىن مەنٸندە, 200 ملن تەڭگەدەن ەشتەڭە تٷسپەگەن, بەلكٸم 200 دوللارداي عانا اۋدارىلعان شىعار. ال بٸز قولعا تيگەن ەسەپ دۇرىس دەپ جٷردٸك. پەريزات بٸزدەن قالعان 93 ملن تەڭگەنٸ دە اۋدارۋدى تالاپ ەتتٸ. بٸز وعان ەسەپتٸ تولىق قابىلداماي, اقشانى بەرمەيتٸنٸمٸزدٸ ناقتى ايتتىق. كەيٸن ٶزٸمٸز ەلشٸلٸك ٶكٸلدەرٸمەن تٸكەلەي بايلانىس ورناتىپ, قارجىنى سول ارقىلى پالەستيناعا اۋداردىق", – دەيدٸ اسحات نۇرماشەۆ.
ونىڭ ايتۋىنشا, دەل سول ۋاقىتتا ەلشٸلٸككە بەلگٸسٸز بٸرەۋلەر "Asar-Ume قورى حالىقتان جينالعان اقشانى ٶز قالتالارىنا باسىپ الدى" دەگەن جالعان اقپارات تاراتا باستاعان. اسحات نۇرماشەۆ مۇنى پەريزات قايراتتىڭ اينالاسىنداعى ادامداردان كٶرەدٸ.
قازٸرگٸ تاڭدا سوت تەرگەۋٸ ەلٸ جٷرٸپ جاتىر. نۇرماشەۆتٸڭ ايتۋىنشا, ول حالىقتىڭ اماناتىنا قييانات جاسالعانىنا, وسىنشا ۋاقىت بويى الدانعانىنا ەلٸ كٷنگە دەيٸن سەنە الار ەمەس. بٸراق, شىندىقتىڭ بەتٸ اشىلعان سايىن, بۇل ٸسكە قاتىستى كٷمەنٸ قالماعانىن دا مويىندايدى.
