Shymkent ákiminiń orynbasary Rýslan Berdenovke jasalǵan shabýyldyń sebebi belgili boldy, dep habarlaidy Dalanews.kz.
Prokýror Baýyrjan Qaramanov sotta oqiǵanyń barlyq jai-japsaryn qamtityn aiyptaý aktisin egjei-tegjeili oqyp berdi.
Is materialdaryna sáikes, 2025 jyldyń 21 sáýirinde aiyptalýshy Ernar Jiembai Shymkent qalalyq qurylys basqarmasynyń salynyp jatqan nysandarǵa monitoring júrgizý bólimi bastyǵynan aqparat alǵan. Ol Jiembaiǵa ákim orynbasary Rýslan Berdenovtiń tapsyrmasymen "Turǵyn úi Shymkent" JShS basshysy qyzmetinen óz erkimen ketýi qajet ekenin aitqan.
Aiyptaýshy taraptyń málimdeýinshe, osy jaittan keiin Jiembaida Berdenovke qatysty óshpendilik pen ony óltirýge degen niet paida bolǵan. Ol dúkenge baryp, ishimdik satyp alyp, ony kólikte iship, keiin úiine baryp, "Saiga" markaly ańshy myltyǵyn alǵan. Biraz ýaqyt boiy qarýdy jubaiyna tiesili kóliktiń júk salǵyshynda saqtaǵan.
Keshke qarai Jiembai qala ákimdiginiń ǵimaratyna baryp, ákimniń orynbasaryn kútken. Berdenovti kórisimen oǵan bes ret oq atqan.
Rýslan Berdenov jaraqat alǵanyna qaramastan qarsylyq kórsetken. Osy sátte oqiǵaǵa ákim orynbasarynyń júrgizýshisi aralasqan.
Aita keteiik, Shymkent qalasynyń qylmystyq ister jónindegi mamandandyrylǵan aýdanaralyq sotynda qala ákiminiń orynbasary Rýslan Berdenovke jasalǵan qastandyq týraly is boiynsha aldyn ala otyrys ótti.
Sot otyrysynda sýdia Abinur Qarabaev Rýslan Berdenovti 6 tamyzǵa josparlanǵan negizgi sot protsesine mindetti túrde qatysýǵa shaqyrdy.
Rýslan Berdenov aldyn ala tyńdaýǵa ózi kelmegen. Onyń ókili Berdenovtiń qazirgi ýaqytta em qabyldap jatqanyn málimdedi.
Bul is boiynsha basty kúdikti - Ernar Jiembai. Ashyq formatta ótken aldyn ala tyńdaý kezinde sýdia Jiembaidyń sot protsesi barysynda ózin túsirýge qarsy ekenin jetkizdi.
