Almaty qalasynyń ákimi Darhan Satybaldynyń tóraǵalyǵymen Medeý aýdanynyń ákimdigimen kezdesý ótti. Jiynda aýdannyń áleýmettik-ekonomikalyq damýy qorytyndylandy,- dep habarlaidy Dalanews.kz
Aýdanda injenerlik infraqurylymdy damytý baǵytyndaǵy birqatar joba qolǵa alynǵan. Atap aitqanda, «Atyraý», «Taýly Qyrat», «Alataý», «Kamensk ústirti» jáne ózge de shaǵynaýdandarda sý qubyry men káriz júieleri salynyp jatyr. Jylý taratý jelilerin jańǵyrtý, kóshe jaryǵy júiesin jańalaý jáne elektrmen qamtý kabel jelileri aýystyrylýda.
Almaty ákimi barlyq injenerlik jobany jobalaý men júzege asyrý jumystaryn jedeldetý qajettigin atap ótti. Shahar basshysy injenerlik jelilerdiń tozý deńgeiine erekshe nazar aýdaryp, jumystardyń sapasy men oryndalý merzimin qatań baqylaýda ustaýdy tapsyrdy. Aýlalardyń ishki injenerlik jelileri de keshendi túrde jańartylýǵa tiis. AlJJ mekemesine barlyq qazý jumysyn kúzge deiin aiaqtaý mindetteldi.
«Erteń turǵyndar eshqandai qolaisyzdyq kórmeýi kerek», – dedi Darhan Satybaldy.
Kezdesý barysynda aýdannyń sanitarlyq jaǵdaiy da qalys qalmady. Turmystyq qaldyqty ýaqytyly shyǵarmaý, ruqsatsyz saýda oryndarynyń paida bolýy, shaǵyn sáýlet pishinderiniń búlinýi men jol jabynynyń zaqymdanýy sekildi máseleler anyqtalǵan. Qala ákimi tazalyq pen tártipti baqylaýdy kúsheitip, mehanikalandyrylǵan tazalaý jumystaryn jandandyrýdy, qýraǵan aǵashtardy kesip-tazalaýdy aiaqtaýdy, synǵan kespe tas pen jaryqtandyrýdy qalpyna keltirýdi tapsyrdy.
«Buǵan deiin de aitqanmyn, ár aýdanda tańnan keshke deiin aýmaqtyń jai-kúiin baqylap otyratyn mobildi top qurý kerek. Máselen, ál-Farabi dańǵylynyń kei jerinde avtomatty sýarý júiesi kógaldy emes, joldy sýaryp jatyr. Eń bastysy, biz qarjy bóldik, merdiger bar. Alaida keibir aýdanda áli kúnge deiin merdiger uiymdardy anyqtaýǵa baiqaý ótkizilmegeni anyqtaldy», – dedi Darhan Satybaldy.
Almaty ákimine berilgen esep boiynsha jyl sońyna deiin ondaǵan aýla men qoǵamdyq keńistik abattandyrylmaq. «Halyq qatysatyn biýdjet» baǵdarlamasy aiasynda turǵyndardyń bastamalary qolǵa alynǵan. «Terrenkýr» demalys aimaǵyn abattandyrý men jasyl jelekti qalpyna keltirý jumystary da aiaqtalýǵa jaqyn.
Kezdesý barysynda aýdannyń jer bederiniń ereksheligi jáne soǵan bailanysty týyndaityn qaýip-qaterler máselesi de kóterildi.
«Medeý – geografiialyq turǵydan eń kúrdeli aýdandardyń biri. Mundaǵy shaǵynaýdandar taý bókterinde ornalasqan, aýmaq sel júrý jáne órt shyǵý qaýpi joǵary aimaqqa jatady. Bul sizderdiń jumystaryńyzdyń ózindik ereksheligin aiqyndaidy. Munda óndiristik nysandar ashýdy talap etpeimiz. Basty mindet – turǵyndarǵa jaily jaǵdai jasaý: kógaldandyrýdy kúsheitý, tazalyq pen qaýipsizdikti qamtamasyz etý», – dedi Darhan Satybaldy.
Kezdesý qorytyndysy boiynsha qala ákimi jylytý maýsymyna ýaqytyly daiyndyqty qamtamasyz etýdi, sel júrý qaýpi bar taý bókterlerindegi órttiń aldyn alý sharalaryn tolyq aiaqtaýdy, zańsyz salynǵan nysandardy buzý jumystaryn kúsheitýdi jáne turǵyndardyń ótinishin tsifrlyq platforma arqyly jedel qaraýdy tapsyrdy.
Sol kúni Darhan Satybaldy Medeý aýdanynyń turǵyndardy qabyldap, olardy tolǵandyrǵan máselelerdi tyńdady. Turǵyndar sý júiesi, jeke sektordy jaryqtandyrý, aýlalardyń sanitarlyq jai-kúii, mektep qasbetin jóndeý jáne aýlalardy kóriktendirý jaiyn qozǵady. Sonymen qatar jańbyr sýyn aǵyzatyn káriz júiesin ornatý, trotýarlardy qalpyna keltirý, áleýmettik qoldaý kórsetý týraly usynystar da aityldy. Árbir ótinishke qatysty jaýapty qyzmetterge naqty tapsyrma berildi. Barlyq másele jiti baqylaýǵa alynyp, aldaǵy jumys josparyna engizildi.
