الماتى قالاسىنىڭ اكىمى دارحان ساتىبالدىنىڭ توراعالىعىمەن مەدەۋ اۋدانىنىڭ اكىمدىگىمەن كەزدەسۋ ءوتتى. جيىندا اۋداننىڭ الەۋمەتتىك-ەكونوميكالىق دامۋى قورىتىندىلاندى،- دەپ حابارلايدى Dalanews.kz
اۋداندا ينجەنەرلىك ينفراقۇرىلىمدى دامىتۋ باعىتىنداعى ءبىرقاتار جوبا قولعا الىنعان. اتاپ ايتقاندا، «اتىراۋ»، «تاۋلى قىرات»، «الاتاۋ»، «كامەنسك ءۇستىرتى» جانە وزگە دە شاعىناۋدانداردا سۋ قۇبىرى مەن كارىز جۇيەلەرى سالىنىپ جاتىر. جىلۋ تاراتۋ جەلىلەرىن جاڭعىرتۋ، كوشە جارىعى جۇيەسىن جاڭالاۋ جانە ەلەكترمەن قامتۋ كابەل جەلىلەرى اۋىستىرىلۋدا.
الماتى اكىمى بارلىق ينجەنەرلىك جوبانى جوبالاۋ مەن جۇزەگە اسىرۋ جۇمىستارىن جەدەلدەتۋ قاجەتتىگىن اتاپ ءوتتى. شاھار باسشىسى ينجەنەرلىك جەلىلەردىڭ توزۋ دەڭگەيىنە ەرەكشە نازار اۋدارىپ، جۇمىستاردىڭ ساپاسى مەن ورىندالۋ مەرزىمىن قاتاڭ باقىلاۋدا ۇستاۋدى تاپسىردى. اۋلالاردىڭ ىشكى ينجەنەرلىك جەلىلەرى دە كەشەندى تۇردە جاڭارتىلۋعا ءتيىس. الجج مەكەمەسىنە بارلىق قازۋ جۇمىسىن كۇزگە دەيىن اياقتاۋ مىندەتتەلدى.
«ەرتەڭ تۇرعىندار ەشقانداي قولايسىزدىق كورمەۋى كەرەك»، – دەدى دارحان ساتىبالدى.
كەزدەسۋ بارىسىندا اۋداننىڭ سانيتارلىق جاعدايى دا قالىس قالمادى. تۇرمىستىق قالدىقتى ۋاقىتىلى شىعارماۋ، رۇقساتسىز ساۋدا ورىندارىنىڭ پايدا بولۋى، شاعىن ساۋلەت پىشىندەرىنىڭ ءبۇلىنۋى مەن جول جابىنىنىڭ زاقىمدانۋى سەكىلدى ماسەلەلەر انىقتالعان. قالا اكىمى تازالىق پەن ءتارتىپتى باقىلاۋدى كۇشەيتىپ، مەحانيكالاندىرىلعان تازالاۋ جۇمىستارىن جانداندىرۋدى، قۋراعان اعاشتاردى كەسىپ-تازالاۋدى اياقتاۋدى، سىنعان كەسپە تاس پەن جارىقتاندىرۋدى قالپىنا كەلتىرۋدى تاپسىردى.
«بۇعان دەيىن دە ايتقانمىن، ءار اۋداندا تاڭنان كەشكە دەيىن اۋماقتىڭ جاي-كۇيىن باقىلاپ وتىراتىن ءموبيلدى توپ قۇرۋ كەرەك. ماسەلەن، ءال-فارابي داڭعىلىنىڭ كەي جەرىندە اۆتوماتتى سۋارۋ جۇيەسى كوگالدى ەمەس، جولدى سۋارىپ جاتىر. ەڭ باستىسى، ءبىز قارجى بولدىك، مەردىگەر بار. الايدا كەيبىر اۋداندا ءالى كۇنگە دەيىن مەردىگەر ۇيىمداردى انىقتاۋعا بايقاۋ وتكىزىلمەگەنى انىقتالدى»، – دەدى دارحان ساتىبالدى.
الماتى اكىمىنە بەرىلگەن ەسەپ بويىنشا جىل سوڭىنا دەيىن ونداعان اۋلا مەن قوعامدىق كەڭىستىك اباتتاندىرىلماق. «حالىق قاتىساتىن بيۋدجەت» باعدارلاماسى اياسىندا تۇرعىنداردىڭ باستامالارى قولعا الىنعان. «تەررەنكۋر» دەمالىس ايماعىن اباتتاندىرۋ مەن جاسىل جەلەكتى قالپىنا كەلتىرۋ جۇمىستارى دا اياقتالۋعا جاقىن.
كەزدەسۋ بارىسىندا اۋداننىڭ جەر بەدەرىنىڭ ەرەكشەلىگى جانە سوعان بايلانىستى تۋىندايتىن قاۋىپ-قاتەرلەر ماسەلەسى دە كوتەرىلدى.
«مەدەۋ – گەوگرافيالىق تۇرعىدان ەڭ كۇردەلى اۋدانداردىڭ ءبىرى. مۇنداعى شاعىناۋداندار تاۋ بوكتەرىندە ورنالاسقان، اۋماق سەل ءجۇرۋ جانە ءورت شىعۋ ءقاۋپى جوعارى ايماققا جاتادى. بۇل سىزدەردىڭ جۇمىستارىڭىزدىڭ وزىندىك ەرەكشەلىگىن ايقىندايدى. مۇندا وندىرىستىك نىساندار اشۋدى تالاپ ەتپەيمىز. باستى مىندەت – تۇرعىندارعا جايلى جاعداي جاساۋ: كوگالداندىرۋدى كۇشەيتۋ، تازالىق پەن قاۋىپسىزدىكتى قامتاماسىز ەتۋ»، – دەدى دارحان ساتىبالدى.
كەزدەسۋ قورىتىندىسى بويىنشا قالا اكىمى جىلىتۋ ماۋسىمىنا ۋاقىتىلى دايىندىقتى قامتاماسىز ەتۋدى، سەل ءجۇرۋ ءقاۋپى بار تاۋ بوكتەرلەرىندەگى ءورتتىڭ الدىن الۋ شارالارىن تولىق اياقتاۋدى، زاڭسىز سالىنعان نىسانداردى بۇزۋ جۇمىستارىن كۇشەيتۋدى جانە تۇرعىنداردىڭ ءوتىنىشىن سيفرلىق پلاتفورما ارقىلى جەدەل قاراۋدى تاپسىردى.
سول كۇنى دارحان ساتىبالدى مەدەۋ اۋدانىنىڭ تۇرعىنداردى قابىلداپ، ولاردى تولعاندىرعان ماسەلەلەردى تىڭدادى. تۇرعىندار سۋ جۇيەسى، جەكە سەكتوردى جارىقتاندىرۋ، اۋلالاردىڭ سانيتارلىق جاي-كۇيى، مەكتەپ قاسبەتىن جوندەۋ جانە اۋلالاردى كورىكتەندىرۋ جايىن قوزعادى. سونىمەن قاتار جاڭبىر سۋىن اعىزاتىن كارىز جۇيەسىن ورناتۋ، تروتۋارلاردى قالپىنا كەلتىرۋ، الەۋمەتتىك قولداۋ كورسەتۋ تۋرالى ۇسىنىستار دا ايتىلدى. ءاربىر وتىنىشكە قاتىستى جاۋاپتى قىزمەتتەرگە ناقتى تاپسىرما بەرىلدى. بارلىق ماسەلە ءجىتى باقىلاۋعا الىنىپ، الداعى جۇمىس جوسپارىنا ەنگىزىلدى.
