Qazaqstanda jasandy intellektti damytý baǵytynda naqty ári júieli qadamdar jasalyp jatyr. Qasym-Jomart Toqaev JI salasynda joǵary bilikti kadr daiarlaý men qoldaýǵa basa nazar aýdarýdy tapsyrǵan bolatyn. 2025 jyldyń qazan aiynda Astanada Ortalyq Aziiadaǵy alǵashqy halyqaralyq TUMO bilim berý ortalyǵy ashylady. Bul ortalyq – 12-18 jas aralyǵyndaǵy jasóspirimderge arnalǵan zamanaýi ári tegin oqytý keńistigi bolmaq. Joba Astana Hub pen armeniialyq TUMO uiymynyń birlesken seriktestigi aiasynda júzege asyrylady,- dep habarlaidy Dalanews.kz
TUMO Astana baǵdarlamasy álemdik deńgeide moiyndalǵan bilim berý modeline negizdelgen. Baǵdarlama 11 baǵytty qamtidy, olardyń qatarynda generativti jasandy intellekt (JI), oiyn ázirleý, animatsiia, kinoóndiris, 3D modeldeý, robototehnika, grafikalyq jáne moýshn-dizain, programmalaý, mýzykalyq kompozitsiia jáne veb-ázirleý bar.
Astana Hub bas direktory Maǵjan Mádiev bul ortalyqtyń ashylýyn Qazaqstannyń ǵalamdyq bilim berý ekojúiesine integratsiialanýyna jasalǵan mańyzdy qadam dep atap ótti.
"TUMO — tsifrlyq bolashaqqa daiyn bolǵysy keletin jastar úshin úlken múmkindik. Bul – qazaqstandyq oqýshylardyń áleýetin ashýǵa baǵyttalǵan bastama", — dedi ol.
Jańa bilim berý ortalyǵy Astanadaǵy Alem.ai jasandy intellekt ortalyǵy ǵimaratynda ornalasady. Bul nysan – Qazaqstandy JI tehnologiialaryn engizýde aimaqtyq kóshbasshy etýge baǵyttalǵan strategiialyq jobalardyń biri.
Prezident Qasym-Jomart Toqaev Alem.ai ortalyǵyna 2024 jyldyń sońynda arnaiy baryp, jobanyń mańyzyn atap ótti. Memleket basshysy jasandy intellektke negizdelgen sheshimderdi barlyq salaǵa engizýdi jedeldetýdi tapsyrǵan bolatyn.
Qazirgi tańda Qazaqstan áleýmettik qorǵaý, ekologiia, tótenshe jaǵdailar men ónerkásip salalarynda úlken derekter men JI arqyly sheshim qabyldaýdy bastap ketti.
Eske salaiyq, TUMO bilim berý ortalyǵy alǵash ret 2011 jyly Erevanda ashylyp, búginde álemniń jeti elinde 18 ortalyqqa deiin keńeidi. Jalpy 80 myńnan astam jasóspirim bul baǵdarlamadan ótip, zamanaýi tehnologiialarmen jumys isteýdi úirendi.
TUMO Astana – Qazaqstanda jastardyń tsifrlyq jáne shyǵarmashylyq áleýetin damytýǵa baǵyttalǵan naqty qadam. Bul ortalyq JI men tehnologiialar dáýirine beiimdelgen jańa býyn mamandaryn daiyndaýǵa yqpal etedi. Sonymen qatar, eldiń kreativti indýstriialar men IT salasyndaǵy adami kapitalyn nyǵaitatyn mańyzdy platforma bolmaq.
