Jetisý oblysy qurylǵannan beri Alakól aýdany boiynsha týrizm salasyn damytýǵa 12,3 mlrd. teńge bólingen. Bul óz kezeginde kól jaǵalaýynyń infraqurylymyn jaqsartýǵa eleýli yqpal etti. Jiyrma bes jyldan beri túitkildi bolyp kelgen elektr jaryǵy máselesi sheshimin tapty. Káriz júiesi salyna bastady. Bul týraly Alakól aýdany turǵyndarymen kezdesýinde oblys ákimi Beibit Isabaev aitty,- dep habarlaidy Dalanews.kz
Memlekettik qoldaýdyń arqasynda jaǵalaýdaǵy elektr qýaty jetispeýshiligi máselesi sheshimin tapty. Atap aitqanda, Aqshi jáne Beskól aýyldarynyń arasynda joǵary kerneýli 56,8 shaqyrym elektr jelisi men 2 qosalqy stantsiianyń negizgi qurylysy salyndy, qazir abattandyrý júrgizilýde, daiyndyq deńgeii 95 %. Ótken jyldary Aqshi aýylynda uzyndyǵy 69,7 shaqyrymdy quraityn magistraldy káriz jelisi salyndy. Biyl Úkimet rezervinen bólingen qarjyǵa Aqshide káriz tazartý qurylǵysyn salý jumystary bastaldy, kelesi jyly aiaqtalady. Kóktuma aýylynda káriz júiesiniń jobasy ázirlenip, qarjylandyrýǵa ótinim berildi.
- Taǵy bir kúrdeli másele jaǵanyń shaiylýy, ony sheshýge baǵyttalǵan joba ázir. Biyl respýblikalyq biýdjetten bastapqy qarjysy bólinip, kóldiń qorshaý bógetin salýdyń birinshi kezeńi bastaldy. Bul jobanyń júzege asýy óńirdegi týrizmniń turaqty damýyna jáne jergilikti halyqtyń qaýipsizdigin qamtamasyz etýge septigin tigizedi. Alaida Alakól aimaǵynda júzege asyrylyp jatqan iri infraqurylymdyq jobalarmen shektelmei, qyzmet kórsetý sapasy men tazalyq deńgeiin odan ári jetildirý qajet, - degen B. Isabaev kól jaǵalaýy tazalyǵyn qatań baqylaýǵa alýdy tapsyrdy.
Osy oraida aita ketsek, biyl kól jaǵalaýyn kútip-ustaýǵa 7 arnaiy tehnika, 19 modýldik sanitarlyq-gigienalyq torap, 140 qoqys jáshigi satyp alynyp, ornatylǵan. Sóitip, jaǵalaýdaǵy turmystyq qaldyqtarǵa arnalǵan konteinerler sany 220-ǵa, sanitarlyq-gigienalyq torap sany 22-ge jetti.
Oblys basshysy sondai-aq sý aidynynda baqylaýsyz sý kólikteriniń júrýin shekteý jáne tyiym salynǵan aýmaqtardaǵy qozǵalysty retteý máselesine de toqtaldy. Ony retteý úshin oblystyń Ortaq sý paidalaný erejesi qabyldanǵan. Erejege sáikes jaǵalaýda shomylatyn oryndar men shaǵyn kemelerdiń shyǵý dálizderi býilar arqyly belgilendi. Sondai-aq sý kóligine arnalǵan toqtaý jáne turaq belgileri ornatylǵan. Búgingi kúni jaǵalaýda kóliktik baqylaý boiynsha 4 inspektor, tótenshe jaǵdailar departamentiniń 12 qutqarýshysy jáne 46 politsiia qyzmetkeri jumys atqarady.
Byltyr kól jaǵasynda demalýshylar sany 1,7 mln. adamǵa jetti, aldyńǵy jylǵy kórsetkishke qaraǵanda demalýshylar qatary 6,2%-ǵa, qyzmet kórsetý kólemi 1,8 ese ósken.
- Aqshi aýylyndaǵy jaǵalaýǵa demalýǵa otbasymyzben keldik. Munda jyl saiyn kelý dástúrge ainalǵan. Jaǵanyń sanitarlyq tazalyǵy da, qyzmet kórsetý sapasy da jyldan jylǵa jaqsaryp keledi. Alakóldiń sýy jaqsy, shipaly. Óz elimizdegi osyndai tabiǵattyń tamasha múmkindikterin paidalanýǵa tiimdi jaǵdai jasalǵany biz úshin, árine, qolaily, - deidi kólde demalýshylardyń biri Áliia Ǵabidollaqyzy.
Eske salaiyq, Alakól jaǵalaýyndaǵy týristik nysandardyń sany 2023 jylǵa qaraǵanda 35,6%-ǵa artyp, búgingi tańda olardyń sany 270-ke jetti.
