Ózbekstannyń Olii Majilis Senaty jasandy intellekt tehnologiialaryn teris paidalaný úshin jaýapkershilik qarastyratyn zań jobasyn maquldady, dep habarlaidy Dalanews.kz jergilikti BAQ-tarǵa silteme jasap.
Jasandy intellekt alǵash ret resmi túrde anyqtaldy
Qujatta alǵash ret «jasandy intellekt» uǵymynyń resmi anyqtamasy engizilip, ony qoldaný tártibi naqty belgilendi. Bul eldegi tsifrlyq sala úshin mańyzdy quqyqtyq qadam bolyp sanalady.
Buzýshylyq úshin aiyppul men qamaý qarastyrylǵan
Jasandy intellektti teris maqsatta paidalaný - mysaly, azamattardyń jeke derekterin ruqsatsyz óńdeý nemese taratý - zań boiynsha jazaǵa tartylady.
Mundai áreketter úshin 50-den 100 eseptik kórsetkishke deiin aiyppul, sondai-aq 15 táýlikke deiin ákimshilik qamaý jáne tehnikany tárkileý sharalary kózdelgen.
Neirojeliler jasaǵan kontent arnaiy belgimen shyǵýy tiis
Zańǵa sáikes, jasandy intellekt kómegimen jasalǵan kez kelgen kontent arnaiy belgimen (markirovkamen) belgilenýi mindetti.
Sonymen qatar, adam quqyqtaryna áser etetin sheshimderdi tek algoritm negizinde, adam qatysýynsyz qabyldaýǵa tyiym salynady.
Maqsat - qaýipsiz jáne senimdi tsifrlyq orta qurý
Senatorlardyń pikirinshe, jańa zań normalary tehnologiialardy qaýipsiz damytýǵa quqyqtyq negiz qalyptastyryp, qoǵamnyń tsifrlyq qyzmetterge degen senimin arttyrady. Qujat qazirdiń ózinde Ózbekstan prezidentiniń qol qoiýyna jiberildi.
