Shyǵys Qazaqstan oblysynda ótip jatqan «Shyǵys salbýryny – 2026» I Aziia kýbogy aiasynda qarshyǵa ushyrý jáne búrkit salý jarystarynyń qorytyndysy jariialandy. Eki kúnge sozylǵan dúbirli dodaǵa 10 elden 170-ten astam qusbegi qatysyp, ulttyq saiatshylyq ónerdiń ozyq úlgilerin kórsetti, dep habarlaidy dalanews.kz.
Dala tósin qanatymen qaq jaryp, kókke samǵaǵan 170-ten astam qyran kórermenniń delebesin qozdyrdy. Qusbegilerdiń baptaý sheberligi men qyrandardyń alǵyrlyǵy synǵa túsken jarysta ár qatysýshy óz ónerin ortaǵa saldy. Búgin aqtyq básekede eń júirik qustar men olardy babyna keltirgen úzdik baptaýshylar anyqtaldy.
Qarshyǵa ushyrý saiysynda Túrkistan oblysynan kelgen Mahmudhan Záki úzdik nátije kórsetip, birinshi oryndy ielendi. Ekinshi oryn Jambyl oblysynyń ókili Babajan Berikbolsynǵa buiyrdy. Al Shyǵys Qazaqstan oblysynyń namysyn qorǵaǵan Múbárak Halifa men Astana qalasynan kelgen Erasyl Serikboluly baptaǵan qarshyǵalary úshinshi orynǵa turaqtady. Qarshyǵa jarysynyń jeńimpazy Mahmudhan Záki sharanyń uiymdastyrylýy men deńgeiine óz baǵasyn berdi.
Qarshyǵam jaqsy nátije kórsetip, birinshi oryndy ielengenime qýanyshtymyn. Osyndai ulttyq dástúrimizdi dáriptep, ár óńirdiń qusbegilerin bir alańǵa jinaǵan uiymdastyrýshylarǵa alǵys aitamyn. Bul saiys – ata-babamyzdan qalǵan saiatshylyq ónerin ulyqtap, keiingi urpaqqa nasihattaýdyń tamasha múmkindigi, – dedi Túrkistan oblysynan kelgen jeńimpaz Mahmudhan Záki.
Búrkit salý básekesinde Jambyl oblysynyń ókili Serikbolsyn Jalǵasuly birinshi oryndy jeńip aldy. Ekinshi oryn Astana qalasynan kelgen Erasyl Serikbekulyna buiyrsa, úshinshi oryndy Aqmola oblysynyń qusbegisi Tastanbek Bergenbai men Almaty qalasynyń ókili Aiajan Daniiarqyzy ielendi.
Shyǵys Qazaqstan oblysy ákiminiń orynbasary Aidar Sadyrbaev sharanyń ulttyq qundylyqtardy dáripteýdegi mańyzyna toqtalyp, mundai halyqaralyq jarystar saiatshylyq ónerdi damytýǵa, qusbegilik dástúrdi keiingi urpaqqa jetkizýge jáne elder arasyndaǵy mádeni bailanysty nyǵaitýǵa múmkindik beretinin atap ótti.
«Shyǵys salbýryny» – halqymyzdyń bai murasyn dáriptep, ulttyq dástúrimizdi jańǵyrtatyn mańyzdy shara. Biylǵy jarysqa on elden 170-ten astam qusbeginiń qatysýy saiatshylyq ónerge degen halyqaralyq qyzyǵýshylyqtyń artyp kele jatqanyn kórsetedi. Mundai aýqymdy básekeler qusbegilik dástúrdi keńinen nasihattap qana qoimai, jas urpaqtyń ulttyq qundylyqtarǵa degen qurmetin qalyptastyrýǵa da yqpal etedi. Bizdiń mindetimiz – ata-babadan amanat bolǵan osy asyl murany saqtap, keler urpaqqa jetkizý, – dedi Aidar Sadyrbaev.
Sonymen qatar «Shyǵys salbýryny – 2026» I Aziia kýbogy qorytyndysy boiynsha júldeli oryndardy ielengen tazy ieleri, asaý úiretý, jamby atý, teńge ilý jáne «Tolaǵai jarysy» boiynsha jeńimpazdar men júldegerlerde marapattaldy.
Tarihy tereńde jatqan bul doda jyl saiyn qansonardyń kórkine ainalyp, qazaqtyń ańshylyq ónerin, qyran qus pen júirik attyń qadirin dáripteitin ulttyq sipattaǵy mereili mereke ainalyp keledi.
