Qazaqstannyń robototehnıka ulttyq quramasy 2025 jylǵy Panama-Sıtı qalasynda ótken FIRST Global Challenge Álemdik olımpıadasynda tórtinshi ret qatarynan jeńiske jetti. Almaty qalasyndaǵy NIS mektebiniń oqýshylar komandasy absolútti chempıon atanyp, 190 eldiń qatysýshylarynan ozyp shyqty, dep habarlaıdy Dalanews.kz.
Qazaqstandyqtar týrnırdiń eń joǵarǵy eki júldesin jeńip aldy: Grand Challenge Award — jarystyń basty kýbogy jáne Albert Einstein Award — kórnekti ınjenerlik sheshimder, ınovasıalar jáne komandalyq jumys úshin beriletin syılyq.
Ulttyq quramanyń sapynda 9–10 synyp oqýshylary Rashat Dosymjan, Daýlet İlıas, Alıhan Orynbasarov, Madıar Ásetuly jáne Nýrasyl Týrsymbaev synǵa tústi. Olardy daıyndaǵan bapkerler: Dýlat Baıtýlenov, Nýrdaýlet Dosmagambet jáne Asylbek Mýrzahmetov.
Panamadaǵy jeńis Qazaqstannyń buǵan deıingi jeńisti jolynyń dástúrli jalǵasy boldy. Elimizdiń daryndy jastary Jenevada (2022), Sıngapýrda (2023) jáne Gresıada (2024) jeńiske jetken. Osylaısha, Qazaqstan FGC tarıhynda tórt márte chempıon atanǵan jalǵyz memleketke aınaldy.
Bıylǵy jarystyń taqyryby — «Eco-Equilibrium» — bıologıalyq ártúrlilikti saqtaý jáne ekologıalyq tepe-teńdik. Qazaqstandyq robot rekordtyq dáldik pen tıimdilikti kórsetti, eldiń jahandyq STEM arenasynda ósip kele jatqan tehnologıalyq áleýetin tanytty.
