Almaty oblysynda 1,5 mlrd teńgege jóndelgen mektepke qatysty tekseris júrgizildi, dep habarlaidy Dalanews.kz.
Buǵan deiin Dalanews.kz redaktsiiasy Ile aýdanyndaǵy №20 mekteptiń sapasyz jóndeý jumystary jaily másele kótergen edi. Osy jariialanymnan keiin oblys ákiminiń orynbasary Ǵani Mailybaev nysanǵa arnaiy baryp, jaǵdaimen tanysty.
Sheneýnik Ile jáne Talǵar aýdandaryndaǵy birqatar bilim berý nysandarynyń naqty ahýalyn kózben kórip, jóndeý sapasyn baǵalady. Qadaǵalaý sharasyna aýdan ákimderi, prokýratýra ókilderi men qoǵam belsendileri de qatysty.
Tekserý barysynda ata-analar men turǵyndar kótergen birqatar kemshiliktiń bar ekeni rastaldy. Ǵani Mailybaev jaýapty merdiger kompaniiadan túsinikteme alýdy jáne jóndeý sapasyna qatysty qosymsha saraptama júrgizýdi tapsyrdy.
Eń aldymen Ǵani Mailybaev Ile aýdanynyń M. Túimebaev aýylyndaǵy №20 orta mektepke bardy. Mektep byltyr aqpan aiyndaǵy jer silkinisinen keiin jaramsyz dep tanylyp, keiin "tótenshe jaǵdaidyń saldaryn joiý jáne qalpyna keltirý jumystary" jobasy aiasynda 1,5 mlrd teńgege jóndelgen edi.
Qujattar boiynsha jumystardy «ARCH STROY INVEST» JShS oryndaǵan, al tehnikalyq jáne avtorlyq qadaǵalaýdy «KA Lider LTD» jáne «Arlan-proekt qurylys» kompaniialary júrgizgen.
Alaida tekserý kezinde oblys ákiminiń orynbasary men komissiia músheleri mektep ǵimaratynan birqatar kemshilikti anyqtady.
Atap aitqanda, jertólede sý aǵýy men káriz júiesindegi aqaýlar áli de saqtalǵan.
Merdiger kompaniia ókilderiniń aitýynsha, 8 qazanda anyqtalǵan jylý júiesindegi aqaýlar joiylyp, jylytý radiatorlary men terezeler ishinara jańartylǵan, al synyptarǵa linoleým tóselip, qasbet aliýminii panelmen qaptalǵan.
Soǵan qaramastan, jylytý júiesindegi jáne jertóledegi máseleler tolyq sheshilmegeni belgili boldy.
"Buǵan qosymsha mektep ǵimaratynyń 2 jáne 3-qabattaryndaǵy 40-qa jýyq jylytý radiatory jańartylyp, kabinetterge linoleým tóselip, terezelerge restavratsiia jasalǵan. Búginde №20 orta mektep ǵimaratynda jóndeý-qalpyna keltirý jumystary aqsap tur", - deidi alatauaraiy.kz agenttigi.
Ǵani Mailybaev jaýapty merdigerlerge kemshilikterdi jedel túrde joiýdy jáne mekteptegi jumystardy tolyq aiaqtaýdy tapsyrdy.
Ol nysandy qatań baqylaýda ustaitynyn jáne sapasyz oryndalǵan jumystar úshin jaýaptylarǵa shara qoldanylatynyn atap ótti.
Eske salaiyq, buǵan deiin Dalanews.kz jariialaǵan materialda ata-analar men aýyl turǵyndary mektep ǵimaratyndaǵy aqaýlardy kórsetip, jóndeýge bólingen 1,5 mlrd teńgeniń qalai jumsalǵanyna kúmán keltirgen bolatyn.
