Petropavlda «Qyzyljar» fýtbol klýbynyń jańa basshylyǵy men qazir Qazaqstan ulttyq quramasynyń bas bapkeri qyzmetin atqaryp júrgen Áli Áliev arasyndaǵy sot daýy jalǵasyp jatyr, dep habarlaidy Dalanews.kz Orda.kz-ke siltep.
Bapker klýbtan jalpy somasy 201 million teńge óndirýdi talap etýde. Bul somaǵa syiaqylar, jalaqy boiynsha bereshek pen eńbek kelisimshartyn buzý úshin ótemaqy kiredi.
Qaishylyq neden bastaldy?
Burynǵy bas bapkerdiń ailyǵy bastapqyda 1 mln teńge bolýy tiis edi. Alaida klýbtaǵy basqarý aýysqannan keiin anyqtalǵandai, oǵan aiyna 10 mln teńge tólenip kelgen. Bul qarajat zańsyz eńbek sharty negizinde aýdarylǵan.
Petropavldyń azamattyq ister jónindegi soty klýbtyń talap-aryzyn qanaǵattandyryp, tirkelmegen kelisimshartty zańsyz dep tanydy. Álievke 2024 jyl boiynsha jalaqyny qaita esepteý usynylǵan. Alaida ol bul talappen kelispei, 2025 jyldyń 9 qańtarynda Qazaqstan fýtbol federatsiiasynyń daýlardy sheshý palatasyna júginip, tómendegi somalardy óndirip berýdi suraǵan:
- Eńbek shartyn buzǵany úshin ótemaqy – 120 mln teńge
- 2024 jyldyń qyrkúiek–jeltoqsan ailary arasyndaǵy jalaqy qaryzy – 40 mln teńge
- Týrnirlik kestedegi besinshi oryn úshin – 20 mln teńge
- Chempionattaǵy 11 jeńis úshin – 11 mln teńge
- Eńbek shartyna qol qoiǵany úshin jeke bonýs – 10 mln teńge
Alaida klýb atalǵan ótemaqy men qaryz boiynsha tólemderdi tóleýden bas tartatynyn resmi túrde málimdegen. Sot materialynda Áliev qosymsha kelisimder boiynsha qaryzdy óteý kestesin bekitýdi suraǵany da kórsetilgen.
Sot sheshimi jáne ministrdiń pikiri
Petropavl qalasynyń №2 sotynyń sheshimi ózgerissiz qaldyrylyp, Áli Álievtiń shaǵymy qanaǵattandyrylmady.
Bul jaǵdaiǵa pikir bildirgen týrizm jáne sport ministri Erbol Myrzabosynov fýtbol federatsiiasy Álievtiń ustanymyn qoldaitynyn, endi bapkerdiń kassatsiialyq sotqa júginetinin málimdedi.
Al 2025 jyldyń 25 shildesinde azamattyq sot jańa sheshim shyǵardy:
«Qyzyl-Jar SK» JShS-niń Áli Álievke qarsy talap-aryzy qanaǵattandyrylyp, 2022–2023 jyldardaǵy eki qosymsha kelisim zańsyz dep tanyldy. Sondai-aq, sot sheshimimen Áli Áliev klýbtyń ókiliniń qyzmeti úshin 1 mln teńge óndirýge mindetteldi. Bul sheshim ázirge zańdy kúshine engen joq.
Klýbtyń qazirgi jaǵdaiy
«Qyzyljar» – Qazaqstandaǵy eń aýqatty bes klýbtyń biri. 2025 jylǵy biýdjeti 2 mlrd teńgeni quraidy, quramynda 11 legioner bar.
Soǵan qaramastan, klýb Premer-ligada qalý úshin kúresip jatyr. Sońǵy oiyndarda komanda taǵy jeńiliske ushyrady. Alda áli toǵyz match bar, biraq jankúierler komandaǵa senýden qalǵandai.
