Qazaqstanda kásibi sportty biýdjettiń arqasynda asyrap otyrý dáýreni aiaqtaldy. Týrizm jáne sport ministriniń 2025 jylǵy 22 shildedegi buiryǵymen elimizdegi kásibi sport klýbtaryna jumsalatyn biýdjet qarajatyna resmi shekteýler engizildi. Bastama biýdjet aqshasyn ońdy-soldy shashýǵa tosqaýyl qoiyp, qarjyny naqty ári tiimdi baǵyttaýǵa negizdelgen,dep habarlaidy Dalanews.kz.
Fýtbol klýbtaryna bólinetin qarajattyń limiti negizgi quram úshin (erler, áielder jáne jastar komandalaryna) jylyna 500 000 AEK-ke (1 mlrd 966 mln teńgege) deiin bekitildi. Buǵan qosymsha balalar men jasóspirimder akademiiasyna jylyna eń kóbi 150 000 AEK (589 mln 800 myń teńge) jumsaýǵa ruqsat berilgen. Osylaisha bir fýtbol klýbyna jumsalatyn memlekettik qarajattyń jalpy somasy 2 mlrd 555 mln teńgeden aspaýy tiis.
Al shaibaly hokkei klýbtaryna qoiylǵan shekteý sál tómendeý. Bul sport túrinde negizgi quramdarǵa jylyna eń kóbi 300 000 AEK (1 mlrd 179 mln 600 myń teńge), al balalar men jasóspirimder akademiiasyna 75 000 AEK (294 mln 900 myń teńge) qarastyrylǵan. Basqa sport túrlerine kelsek, erler men áielder komandalaryn, sondai-aq jastar quramdaryn jáne akademiialardy qarjylandyrý birdei deńgeide bekitilgen – jylyna ár klýbqa eń kóbi 120 000 AEK (471 mln 840 myń teńge).
Sonymen qatar sportshylar men jattyqtyrýshylardyń eń joǵary ailyq jalaqylaryna da shekteýler engizildi. Bas jattyqtyrýshylar men konsýltant-trenerlerdiń, sondai-aq negizgi quram sportshylarynyń ailyq tabysy eń kóbi 500 AEK (1 mln 966 myń teńge), al jastar quramynyń sportshylarynyń jalaqysy 80 AEK-ten (314 myń 560 teńge) aspaýy qajet.
Taǵy bir mańyzdy ereje bir óńirde jergilikti biýdjet esebinen bir sport túrine bir ǵana klýb qarjylandyrylady. Mundai qadam klýbtar arasyndaǵy básekelestikti kúsheitip, sporttyń buqaralyq sipat alýyna túrtki bolmaq.
Jańa talap 2025 jylǵy 25 shildeden bastap kúshine endi.
