Mıhaıl Mıshýstın Omby qalasynda ornalasqan Qazaqstannyń jetekshi joǵary oqý oryndarynyń biri – ál-Farabı atyndaǵy Qazaq ulttyq ýnıversıtetiniń fılıalyna bardy. QazUÝ – Reseı aýmaǵynda óz fılıalyn ashqan alǵashqy qazaqstandyq joǵary oqý orny.
Qazaqstan tarapynan kezdesýge QR Ǵylym jáne joǵary bilim mınıstri Saıasat Nurbek pen ál-Farabı atyndaǵy QazUÝ rektory Janseıit Túımebaev qatysty.
Reseı tarapynan sharaǵa RF Ǵylym jáne joǵary bilim mınıstri Valerıı Falkov, Omby oblysynyń gýbernatory Vıtalıı Hosenko, Omby oblysynyń joǵary bilim jáne ǵylymı-tehnologıalyq damý mınıstri Aleksandr Kolsov, F.M.Dostoevskıı atyndaǵy Omby memlekettik ýnıversıtetiniń rektor mindetin atqarýshy Ivan Krott qatysty.
Qonaqtar qabyldaý komısıasynyń jumysymen tanysyp, QazUÝ-dyń oqý korpýsy men ǵylymı kitaphanasyn aralady.
Kezdesý barysynda QazUÝ rektory fılıaldyń qurylý tarıhy jóninde aıtyp ótti, al Saıasat Nurbek Qazaqstandaǵy reseılik joǵary oqý oryndarynyń fılıaldarynyń qyzmeti týraly baıandady.
QazUÝ fılıalynyń Omby memlekettik ýnıversıteti bazasyndaǵy resmı ashylýy 2024 jylǵy 27 qarashada eki el prezıdentteriniń qatysýymen ótti.
RF Úkimetiniń Tóraǵasy Qazaqstanda jumys istep jatqan reseılik fılıaldardyń belsendi qyzmeti úshin alǵys bildirip, Ombyda qazaqstandyq jetekshi ýnıversıtettiń fılıalynyń ashylýynyń mańyzdylyǵyn erekshe atap ótti. Sonymen qatar ol talapkerlerdi QazUÝ fılıalyna oqýǵa túsýge shaqyrdy.
Qazirgi tańda qabyldaý naýqany aıasynda fılıal bakalavrıattyń úsh baǵyty boıynsha, atap aıtqanda, fılologıa fakúltetinen «Qazaq tili men ádebıeti», zań fakúltetinen «Keden isi», halyqaralyq qatynastar fakúltetinen «Halyqaralyq quqyq» baǵyttary boıynsha stýdentterdi qabyldap jatyr. Fılıalǵa jalpy 200-250 talapkerdi qabyldaý josparlanyp otyr.
