Mihail Mishýstin Omby qalasynda ornalasqan Qazaqstannyń jetekshi joǵary oqý oryndarynyń biri – ál-Farabi atyndaǵy Qazaq ulttyq ýniversitetiniń filialyna bardy. QazUÝ – Resei aýmaǵynda óz filialyn ashqan alǵashqy qazaqstandyq joǵary oqý orny.
Qazaqstan tarapynan kezdesýge QR Ǵylym jáne joǵary bilim ministri Saiasat Nurbek pen ál-Farabi atyndaǵy QazUÝ rektory Janseiit Túimebaev qatysty.
Resei tarapynan sharaǵa RF Ǵylym jáne joǵary bilim ministri Valerii Falkov, Omby oblysynyń gýbernatory Vitalii Hotsenko, Omby oblysynyń joǵary bilim jáne ǵylymi-tehnologiialyq damý ministri Aleksandr Koltsov, F.M.Dostoevskii atyndaǵy Omby memlekettik ýniversitetiniń rektor mindetin atqarýshy Ivan Krott qatysty.
Qonaqtar qabyldaý komissiiasynyń jumysymen tanysyp, QazUÝ-dyń oqý korpýsy men ǵylymi kitaphanasyn aralady.
Kezdesý barysynda QazUÝ rektory filialdyń qurylý tarihy jóninde aityp ótti, al Saiasat Nurbek Qazaqstandaǵy reseilik joǵary oqý oryndarynyń filialdarynyń qyzmeti týraly baiandady.
QazUÝ filialynyń Omby memlekettik ýniversiteti bazasyndaǵy resmi ashylýy 2024 jylǵy 27 qarashada eki el prezidentteriniń qatysýymen ótti.
RF Úkimetiniń Tóraǵasy Qazaqstanda jumys istep jatqan reseilik filialdardyń belsendi qyzmeti úshin alǵys bildirip, Ombyda qazaqstandyq jetekshi ýniversitettiń filialynyń ashylýynyń mańyzdylyǵyn erekshe atap ótti. Sonymen qatar ol talapkerlerdi QazUÝ filialyna oqýǵa túsýge shaqyrdy.
Qazirgi tańda qabyldaý naýqany aiasynda filial bakalavriattyń úsh baǵyty boiynsha, atap aitqanda, filologiia fakýltetinen «Qazaq tili men ádebieti», zań fakýltetinen «Keden isi», halyqaralyq qatynastar fakýltetinen «Halyqaralyq quqyq» baǵyttary boiynsha stýdentterdi qabyldap jatyr. Filialǵa jalpy 200-250 talapkerdi qabyldaý josparlanyp otyr.
