Qostanai qalalyq №2 soty birneshe adamdy páter alyp beremin dep aldaǵan áielge qatysty úkim shyǵardy, dep habarlaidy dalanews.kz.
Sot materialdaryna sáikes, aiyptalýshy ózin jyljymaityn múlik alýǵa kómektesetin deldal retinde tanystyryp, turǵyndarǵa naryqtaǵy baǵadan áldeqaida arzan páter alyp berýge ýáde etken. Osylaisha ol segiz azamattyń senimine kirip, olardan 30 million teńgeden astam qarajat alǵan.
Tergeý barysynda áieldiń 2022 jyldyń sáýirinen 2024 jyldyń qyrkúiegine deiin jalǵan ýádeler berip, óz áreketin zańdy mámile retinde kórsetip kelgeni anyqtaldy.
Sotta prokýror aiyptalýshyny 4 jyl 8 aiǵa bas bostandyǵynan aiyrýdy surady. Al jábirlenýshiler keltirilgen shyǵynnyń tolyq ótelýin jáne qatań jaza taǵaiyndaýdy talap etti.
Sot aiyptalýshynyń kinásin moiyndaǵanyn, jasaǵan isine ókinish bildirgenin, kámeletke tolmaǵan balalary bar ekenin jáne aýyrlatatyn mán-jailardyń joqtyǵyn eskerdi.
Nátijesinde áiel 4 jylǵa bas bostandyǵynan aiyryldy. Keiin raqymshylyq týraly zańǵa sáikes jaza merzimi 2 jyl 8 aiǵa deiin qysqartyldy. Sondai-aq onyń jas balasy baryn eskergen sot jazany óteýdi bes jylǵa keiinge qaldyrdy.
Jábirlenýshilerdiń materialdyq shyǵyndy óndirý týraly talaptary tolyq qanaǵattandyryldy. Úkim ázirge zańdy kúshine engen joq.
