Áleýmettik jelide belgili bloger Erjan Rashev Donald Tramptyń AQSH-pen Grenlandıany qosý týraly usynysyna qatysty oıyn aıtty, dep habarlaıdy Dalanews.kz.
"Biz Tramptyń Grenlandıany satyp alǵysy keletini týraly usynysyna kúle qaraımyz. Biraq shynyna keler bolsaq, eger Tramp Qazaqstandy mysaly 500 mıllıard dollarǵa satyp alýdy (ár qazaqstandyqqa 25 myń dollardan) usynyp, ony AQSH-tyń 51-shtaty qylsa, ony qazaqtardyń 90 paıyzy qoldar edi", deıdi bloger.
Aıta keteıik, Kýrsıv málimetinshe,jaqynda AQSH prezıdenti retinde resmı túrde qyzmetine kirisetin Donald Tramp ekonomıkalyq qaýipsizdik úshin Grenlandıa men Panama kanalyn satyp alý týraly oıyn jetkizdi. Buǵan aralǵa ıelik etetin Danıa ótkir jaýap qatyp, Grenlandıanyń AQSH-qa ótkennen góri, táýelsiz memleket ataný yqtımaldyǵy joǵary ekenin málim etti.
Euronews.com AQSH prezıdentiniń qyzyǵýshylyǵyn týdyryp otyrǵan araldyń ekonomıkalyq, klımattyq ári geosaıası mańyzy zor ekenin jazdy.
Basylym málimetinshe, Grenlandıa qoınaýynda telekomýnıkasıa úshin qajetti qundy sırek kezdesetin mıneraldar, ýran, mıllıardtaǵan ıgerilmegen munaı men qoljetimdi bola bastaǵan tabıǵı gazdyń orasan zor qory bar.
Qashyqta jatqan, muzben kómkerilgen jáne kóp bóligi tabıǵı qalpyn saqtaǵan Grenlandıa kún saıyn mıllıardtaǵan adamǵa áser etetin aýa raıy men ǵalamsharda bolyp jatqan klımattyq ózgeristerde úlken ról atqarady.
