Ulttyq bank teńge dızaınyn turaqty túrde jańartýdy banknottardyń jalǵan aqsha jasaýdan qorǵanys deńgeıin arttyrýmen túsindirdi, dep habarlaıdy Dalanews.kz.
«Qazaq Eli» serıasynan «Saq stıline» deıin
Redaksıanyń resmı saýalyna bergen jaýabynda qarjy ınstıtýty qoldanylyp júrgen qorǵanys elementteriniń «ómirlik sıkline» baılanysty banknot dızaınyn kezeń-kezeńimen jańartý jumystary júrgiziletinin aıtty.
"Mysaly, 2011 jyldan aınalymda júrgen «Qazaq Eli» serıasyndaǵy banknottardyń keıbir qorǵanys elementterin búginde qoldan jasaýshylar ımıtasıalaı alady. Bul – dızaındy jáne qorǵanys elementterin qaıta qaraýǵa alǵysharttardyń biri", – dep málimdedi Ulttyq bank Informburo.kz-ke.
Sondaı-aq, banknot dızaınyn ózgertý – álemde keń taralǵan tájirıbe ekeni atap ótildi.
«Saq stıliniń» maqsaty qandaı?
Jańa «Saq stıli» serıasynyń basty maqsaty – ulttyq valútanyń qorǵanys deńgeıin arttyrý, qoldanystaǵy yńǵaılylyǵyn jaqsartý, sonymen birge Qazaqstannyń mádenı qundylyqtary men tarıhyn nasıhattaý.
5000 teńgelik jańa dızaındaǵy banknottar alǵash ret 2023 jyldyń jeltoqsanynda shyǵaryldy. Al jappaı aınalymǵa 2024 jyldyń naýryzynda tústi. Bul banknottardyń negizgi ereksheligi – olardyń kóleminiń kishireıgeni. Sonyń arqasynda olardy saqtaý jáne tasymaldaý áldeqaıda yńǵaıly boldy.
