ۇلتتىق بانك تەڭگە ديزاينىن تۇراقتى تۇردە جاڭارتۋدى بانكنوتتاردىڭ جالعان اقشا جاساۋدان قورعانىس دەڭگەيىن ارتتىرۋمەن ءتۇسىندىردى، دەپ حابارلايدى Dalanews.kz.
«قازاق ەلى» سەرياسىنان «ساق ستيلىنە» دەيىن
رەداكسيانىڭ رەسمي ساۋالىنا بەرگەن جاۋابىندا قارجى ينستيتۋتى قولدانىلىپ جۇرگەن قورعانىس ەلەمەنتتەرىنىڭ «ومىرلىك سيكلىنە» بايلانىستى بانكنوت ديزاينىن كەزەڭ-كەزەڭىمەن جاڭارتۋ جۇمىستارى جۇرگىزىلەتىنىن ايتتى.
"مىسالى، 2011 جىلدان اينالىمدا جۇرگەن «قازاق ەلى» سەرياسىنداعى بانكنوتتاردىڭ كەيبىر قورعانىس ەلەمەنتتەرىن بۇگىندە قولدان جاساۋشىلار يميتاسيالاي الادى. بۇل – ديزايندى جانە قورعانىس ەلەمەنتتەرىن قايتا قاراۋعا العىشارتتاردىڭ ءبىرى"، – دەپ مالىمدەدى ۇلتتىق بانك Informburo.kz-كە.
سونداي-اق، بانكنوت ديزاينىن وزگەرتۋ – الەمدە كەڭ تارالعان تاجىريبە ەكەنى اتاپ ءوتىلدى.
«ساق ءستيلىنىڭ» ماقساتى قانداي؟
جاڭا «ساق ءستيلى» سەرياسىنىڭ باستى ماقساتى – ۇلتتىق ۆاليۋتانىڭ قورعانىس دەڭگەيىن ارتتىرۋ، قولدانىستاعى ىڭعايلىلىعىن جاقسارتۋ، سونىمەن بىرگە قازاقستاننىڭ مادەني قۇندىلىقتارى مەن تاريحىن ناسيحاتتاۋ.
5000 تەڭگەلىك جاڭا ديزاينداعى بانكنوتتار العاش رەت 2023 جىلدىڭ جەلتوقسانىندا شىعارىلدى. ال جاپپاي اينالىمعا 2024 جىلدىڭ ناۋرىزىندا ءتۇستى. بۇل بانكنوتتاردىڭ نەگىزگى ەرەكشەلىگى – ولاردىڭ كولەمىنىڭ كىشىرەيگەنى. سونىڭ ارقاسىندا ولاردى ساقتاۋ جانە تاسىمالداۋ الدەقايدا ىڭعايلى بولدى.
