Prezident Konstitýtsiialyq sot tóraǵasy Elvira Azimovany qabyldady,- dep habarlaidy Dalanews.kz.
Memleket basshysyna Konstitýtsiialyq sot qyzmetiniń nátijeleri jóninde málimet berildi.
Elvira Azimovanyń aitýynsha, 2,5 jyl ishinde vedomstvoǵa azamattardan 11 myńnan astam ótinish kelip túsken. Konstitýtsiialyq sot sýdialary ótinishterdi qaraý barysynda 5 myńnan asa quqyq normasyn zerdeledi. Tekserý qorytyndysy boiynsha 300-den astam sheshim qabyldandy. Sonyń ishinde zańdar men basqa da normativtik aktilerdiń Konstitýtsiiaǵa sáikestigi turǵysynan 74 qorytyndy qaýly shyǵaryldy. Osylaisha, 20 quqyq normasy Konstitýtsiiaǵa qaishy dep tanylyp, 25 quqyq normasyna naqty túsindirme berildi.
Búginge deiin zańdarǵa ózgerister men tolyqtyrýlar engizý arqyly 41 normativtik qaýly oryndaldy. Qazir Konstitýtsiialyq sottyń 19 normativtik qaýlysyndaǵy quqyqtyq ustanymdary eskerilgen 8 zań jobasy Parlament palatalarynda qaralyp jatyr.
Qasym-Jomart Toqaevqa azamattar egjei-tegjeili quqyqtyq keńes alý úshin Konstitýtsiialyq sot apparaty janyndaǵy Ótinishterdi qabyldaý ortalyǵyna júgine alatyny jóninde baiandaldy. Buǵan deiin mundai konsýltatsiialardy myńnan astam adam aldy. Ortalyqtaǵy zań konsýltanttary men advokattar azamattarǵa tegin keńes beredi.
Prezidenttiń pikirinshe, Konstitýtsiialyq sot azamattardyń quqyqtary men bostandyqtaryn qorǵaýǵa kepil bolýǵa tiis. Sonymen qatar sot organynyń quqyqtyq ustanymdaryn dáiekti túrde iske asyrý mańyzdy.
