Bas prokýratýranyń Quqyqtyq statistika jáne arnaiy esepke alý komiteti Google derekter bazasynyń buzylýyna bailanysty kiberqater anyqtalǵanyn habarlady. Gmail qoldanýshylarynyń bailanys derekteri men kompaniia ataýlary qoldy bolǵan. Barlyǵy shamamen 2,5 milliard akkaýnt zardap shekkenimen, qupiiasózderdiń ózderi urlanbaǵan, dep habarlaidy Dalanews.kz.
ShinyHunters shabýyly
Vedomstvo málimetinshe, shabýyldy ShinyHunters atty top uiymdastyrǵan. Olar áleýmettik injeneriia ádisin qoldanǵan: ózin IT-qoldaý qyzmetiniń mamany retinde tanystyrǵan qaskóiler Google qyzmetkerin aldap, ony ziiandy Salesforce Data Loader qosymshasyn avtorizatsiialaýǵa kóndirgen.
– qaskóiler Google qyzmetkeri retinde kórsetilip, fishingtik jáne jalǵan qońyraý shabýyldaryn belsendi júrgizgen. Keibir qoldanýshylar 650 kodymen bastalatyn nómirlerden qońyraýlar alyp, Gmail qupiiasózin qalpyna keltirýdi talap etkenin habarlaǵan. Maqsat – kodtar men parolderdi aldap alý nemese akkaýnttarǵa qol jetkizý, – delingen komitet habarlamasynda.
Gmail akkaýnttaryn qorǵaý boiynsha usynystar
Vedomstvo qazaqstandyqtarǵa mynadai qaýipsizdik sharalaryn qabyldaýdy usynady:
- qupiiasózderdi dereý aýystyrý, ásirese qarapaiym nemese birneshe jerde qaitalanatyndaryn;
- qos faktorly aýtentifikatsiiany qosý nemese biometriia, PIN siiaqty zamanaýi ádisterdi paidalaný;
- «Google atynan» kelgen qońyraýlarǵa nemese hattarǵa senbeý – mundaidyń 10-nyń 9-y alaiaqtyq bolady;
- akkaýntqa qoljetimdilikti shekteý, qosylǵan qosymshalar men bailanystardy baqylap otyrý.
Sonymen qatar, Bas prokýratýra ishinara jariia derekterdiń ózi aýqymdy alaiaqtyq shemalardyń negizine ainalýy múmkin ekenin eskertedi. Sondyqtan paidalanýshylarǵa jáne uiymdarǵa akkaýnt baptaýlaryn júieli túrde tekserip, qaýipsizdik sharalaryn qatań saqtaýǵa keńes beriledi.
