Buryn munai óndirýde erikti shekteýlermen kelisken, biraq belgilengen kvotalardan asyp ketken OPEK + elderi 2026 jyldyń shildesine deiin táýligine artyq óndirilgen 4,779 mln barreldi óteýi kerek. Onyń basym bóligi Qazaqstanǵa tiesili bolyp shyqty: táýligine 2,63 mln barrel, dep habarlaidy Dalanews.kz Kapital.kz saityna silteme jasap.
Iaǵni, jýyrda OPEK+ aiasynda munai óndirisi kólemin arttyrýǵa múmkindik berilgenimen, Qazaqstan 2026 jyldyń maýsymyna deiin ony qysqartýmen bolady. Qysqartý kezeńi 2026 jyldyń maýsymyna (qosa eseptegende) deiin jalǵasady.
Qazaqstan úshin munai óndirisi kólemin qysqartý kestesi kelesidei:
- 2026 jyldyń qańtary: -100 myń t/b;
- aqpan: -300 myń t/b;
- naýryz: -450 myń t/b;
- sáýir: -490 myń t/b;
- mamyr: -550 myń t/b;
- maýsym: -650 myń t/b.
2025 jyldyń sońyna deiin munai óndirisi kólemin tómendeý qalypty jaǵdaida júzege asady: ai saiyn táýligine 10 myńnan 35 myń barrelge deiin.
Basqa elder:
- Irak- 1,4 mln t/b (2026 jyldyń maýsymyna deiin birkelki).
- Resei - 311 myń t/b (2025 jyldyń sońyna deiin).
- BAÁ-309 myń t/b (2026 jyldyń maýsymyna deiin).
- Oman - 70 myń t/b (2026 jyldyń naýryzyna deiin).
- Kýveit - 59 myń t/b (2025 jyldyń qyrkúiek aiynyń sońyna deiin).
Saýd Arabiiasy men Aljir munaidy artyq óndirmei, kvota talaptaryn qaltqysyz oryndaǵan.
"Goldman Sachs málimetteri boiynsha, Qazaqstan uzaq ýaqyt boiy kvotalardy buzyp keldi, iaǵni ken oryndarynyń ishki erekshelikterin jáne qabattardaǵy qysymdy ustap turý qajettiligin alǵa tarta otyryp, munaidy kelisilgen kólemnen kóbirek óndirdi. Endi jaǵdai, kerisinshe sipatqa ie bolýda. Qazaqstan óndiristi ulǵaitý týraly OPEK josparyna jýyqtai almaýda. Jeltoqsanǵa qarai talap etiletin táýligine 100 myń barrel ósimniń ornyna elimiz 29 myńǵa, al naýryz-shilde ailarynda 37 myńǵa "qara altyn" óndirisi kólemin qysqartady. Bul eldi ádettegi quqyq buzýshydan problemalyq óndirýshige ainaldyrady", dep jazady Eldar Shamsýtdinov jelide.
Buǵan deiin Qazaqstan da múshesi bolyp tabylatyn OPEK + elderi kelesi aida naryqtaǵy úlesin ulǵaitýǵa umtyla otyryp, munai óndirisi kólemin arttyrýǵa ózara keliskenin jazǵanbyz. Ondaǵy esepteýlerge súiene otyryp, Qazaqstan qazan aiynda munai óndirisi kólemin 1,556 mln barrelge deiin arttyrýǵa múmkindigi bary da aitylyp edi.
