Irannyń Islam revoliýtsiiasy saqshylary korpýsy Ormýz buǵazy mańynda ruqsatsyz ótpek bolǵan eki konteinerlik kemeni qolǵa túsirdi, dep habarlaidy Dalanews.kz Press TV telearnasyna silteme jasap.
Málimetke sáikes, ustalǵan kemeler — MSC-Francesca jáne Epaminondas. Iran tarapynyń málimdeýinshe, Epaminondas kemesi AQSh áskeri qurylymdarymen bailanysta bolýy múmkin, al MSC-Francesca Izrailmen bailanysy bar degen kúdikke ilingen.
Irandyq BAQ dereginshe, kemeler júkteri men qujattaryn tekserý úshin eldiń aýmaqtyq sýlaryna jetkizilgen.
Habarlamada Epaminondas kemesiniń Liberiia týy astynda júzip, Úndistandaǵy Mýndra portyna baǵyt alǵany aitylǵan. Sondai-aq 2024–2026 jyldary keme AQSh-tyń 11 portynda 36 ret aialdap, shamamen 299 myń tonna júk túsirgeni kórsetilgen.
Eske salaiyq, 13 sáýirde AQSh áskeri-teńiz kúshteri Ormýz buǵazy arqyly Iran porttaryna kirip-shyǵatyn teńiz qozǵalysyn baqylaýǵa alǵan bolatyn.
Aita keteiik, álemdegi munai, munai ónimderi men suiytylǵan gazdyń shamamen 20 paiyzy dál osy Ormýz buǵazy arqyly tasymaldanady. AQSh pen Iran arasyndaǵy shielenis kúsheigen tusta bul aimaqtaǵy jaǵdai halyqaralyq qaýymdastyq nazarynda qalyp otyr.
