Qazaqstanda zeinetaqy júiesin reformalaý boiynsha jańa tásilder ázirlenip jatyr, alaida zeinetke shyǵý jasyn ózgertý josparlanbaǵan, dep habarlaidy dalanews.kz.
Bul týraly Senat kýlýarynda Ulttyq bank tóraǵasy Timýr Súleimenov málimdedi.
«Bizde demografiialyq qurylym ózgerip jatyr, ómir súrý uzaqtyǵy artyp keledi. Sondyqtan zeinetaqy júiesin jańa jaǵdailarǵa beiimdeý qajet. Osyǵan bailanysty Eńbek ministrligimen birlesip jumys istep jatyrmyz. Qyrkúiek aiyna qarai zeinetaqy júiesin reformalaýǵa qatysty jańa tujyrymdamalyq tásilderdi usynamyz dep úmittenemiz», – dedi Súleimenov.
Sonymen qatar Ulttyq bank basshysy reforma aiasynda zeinetke shyǵý jasyn kóterý qarastyrylmaitynyn atap ótti.
«Zeinetke shyǵý jasyn ózgertý josparlanyp otyrǵan joq. Belgili bir tásilder qaita qaralady. Óz tarapymyzdan zeinetaqy qorynyń tabystylyǵyn arttyrýǵa baǵyttalǵan birqatar sharalardy qabyldaýdy josparlap otyrmyz. Bul zeinetke shyqqan kezde tabysty almastyrý koeffitsientin joǵarylatýǵa múmkindik beredi», – dedi ol.
Eske salsaq, buǵan deiin Biryńǵai jinaqtaýshy zeinetaqy qory sońǵy 12 aida (2025 jyldyń naýryzynan 2026 jyldyń aqpanyna deiin) Ulttyq bank qazaqstandyqtardyń zeinetaqy aktivterin basqarý arqyly shamamen 2,66 trln teńge tabys tapqanyn habarlaǵan.
Alaida osy kezeńdegi tabystylyq 11,39 paiyzdy qurap, 11,7 paiyzdyq infliatsiia deńgeiin áreń japqan.
