Qazaqstanda jol apatynyń sany áli de joǵary deńgeide qalyp otyr. 2026 jylǵy qańtar-mamyr aralyǵynda 12,2 myń jol apaty tirkelgen. Bul byltyrǵy kórsetkishpen shamalas, dep habarlaidy dalanews.kz energyprom.kz-ke siltep.
Soǵan qaramastan, jol apattarynan qaza tapqandar sany azaiǵan. Biylǵy bes aida elimizde 600 adam jol apatynan kóz jumǵan. Byltyr osy kezeńde 740 adam, al 2024 jyly 767 adam qaitys bolǵan.
Jaraqat alǵandar sany da birshama tómendegen. 2025 jyly qańtar-mamyr aralyǵynda 16,6 myń adam zardap shekse, biyl bul kórsetkish 16,1 myń adamǵa deiin azaiǵan.
Óńirler arasynda jol apattarynyń eń kóbi Almaty qalasynda tirkelgen. Megapoliste bes ai ishinde 3 myń jol apaty bolǵan. Bul – respýblikadaǵy barlyq apattyń tórtten birine jýyq kórsetkish. Odan keiin Almaty oblysy (1,2 myń jaǵdai) men Astana qalasy (964 jaǵdai) tur. Al eń tómen kórsetkish Ulytaý oblysynda tirkelgen: 82 oqiǵa.
Sarapshylar Almatydaǵy joǵary kórsetkishti qala halqynyń kóptigimen jáne kólik qozǵalysynyń qarqyndylyǵymen bailanystyrady. Qalada tirkelgen kólikter sany da respýblika boiynsha eń joǵary deńgeide.
Jaraqat alǵandar sany boiynsha da Almaty kósh bastap tur. Munda jol apattarynan 3,2 myń adam zardap shekken. Almaty oblysynda 1,8 myń adam, Astanada 1,1 myń adam jáne Jambyl oblysynda 1 myń adam jaraqat alǵan.
Al adam ólimine qatysty jaǵdai ózgeshe. Qaza tapqandar sany boiynsha Túrkistan oblysy birinshi orynda tur. Óńirde bes ai ishinde jol apattarynan 100 adam kóz jumǵan. Almaty oblysynda 84 adam, Jambyl oblysynda 58 adam qaitys bolǵan.
Jol apaty eń kóp tirkelgen Almaty qalasynda 22 adam, al Astanada 11 adam qaza tapqan.
Adam ólimine ákelgen jol apattarynyń eń kóbi Túrkistan oblysynda tirkeldi: 76 jaǵdai. Almaty oblysynda 71, Jambyl oblysynda 48 oqiǵa bolǵan. Jalpy mundai apattardyń 42,1 paiyzy osy úsh óńirdiń úlesine tiesili.
