Máskeý 18 maýsymǵa qaraǵan túni soǵys bastalǵaly bergi eń aýqymdy ushqyshsyz ushý apparattarynyń shabýylyna tap boldy. Resei astanasynyń meri Sergei Sobianinniń málimetinshe, qalaǵa qarai baǵyttalǵan 180-nen astam dron atyp túsirilgen, dep habarlaidy dalanews.kz.
Sarapshylardyń pikirinshe, bul shabýyl Ýkraina qarýly kúshteriniń Reseidiń áýe shabýylyna qarsy qorǵanys júiesin ainalyp ótý múmkindigi artqanyn kórsetedi.
Máskeý munai óńdeý zaýyty taǵy da nysanaǵa alyndy
Shabýyldyń negizgi nysandarynyń biri Máskeý oblysyndaǵy Kapotnia aýdanynda ornalasqan munai óńdeý zaýyty boldy. Astra basylymy men ýkrainalyq monitoringtik arnalar jariialaǵan videolarda kásiporyn aýmaǵynda birneshe órt oshaǵy baiqalǵan. Exilenova+ arnasy zaýyt aýmaǵynda jeti órt oshaǵy tirkelgenin habarlady. Sergei Sobianin de birneshe dronnyń zaýytqa jetkenin rastady.
Eske salsaq, eki kún buryn dál osy kásiporynǵa jasalǵan shabýyldan keiin zaýyt jumysy ýaqytsha toqtatylǵan bolatyn.
Turǵyn úiler men nysandar zardap shekti
Shabýyl saldarynan Máskeý oblysyndaǵy birneshe turǵyn jáne óndiristik nysanǵa zaqym kelgen. Atap aitqanda, Novye Kotelniki aýdanyndaǵy kópqabatty turǵyn úidiń joǵarǵy qabattary búlingen. Sondai-aq Jýkovskii qalasyndaǵy turǵyn úige, Chehovtaǵy jeke úige, Elektrostal qalasyndaǵy baspanaǵa dron synyqtary túskeni habarlandy. Liýbertsy qalasynda fitnes-ortalyq pen óndiristik nysan zaqymdansa, Pavlovskii Posad aýdanynda eki saiajai órtengen. Máskeý oblysynyń gýbernatory Andrei Vorobevtiń aitýynsha, kei jerlerde avtokólikter de órtengen.
Áýejailar jumysy shekteldi
Shabýyl kezinde Máskeýdegi barlyq negizgi áýejailardyń jumysyna ýaqytsha shekteý engizildi. Aldymen «Vnýkovo» áýejaiynda shekteýler qoiylyp, keiin barlyq áýejailar jabyldy. Shekteýler tańǵy saǵat segizden keiin ǵana alyndy.
Budan bólek, «Sheremetevo» áýejaiynda jolaýshylar evakýatsiialanǵan. Keibir adamdar ushaqtardyń ózinen shyǵarylǵan.
Qalada qaýipsizdik sharalary kúsheitildi
Shabýyl kezinde Máskeý munai óńdeý zaýyty mańyndaǵy birneshe kóshe jabyldy. Sonymen qatar Máskeý ainalma jolynyń bir bóligi ýaqytsha kólik qozǵalysyna jabylǵan. Áleýmettik jelilerde jariialanǵan fotosýretterde Qyzyl alań men Kreml mańynda kúsheitilgen kúzet qoiylǵany baiqalady. Kadrlarda Kreml qabyrǵalary men munaralarynda pýlemetpen qarýlanǵan áskeri qyzmetkerler kórinedi.
Buǵan deiingi shabýyldardan aýqymdy boldy
Resei biliginiń málimetinshe, buǵan deiin Máskeýge jasalǵan eń iri shabýyl 2025 jylǵy 11 naýryzda tirkelgen. Ol kezde astanaǵa qarai ushqan 74 dron atyp túsirilgen edi. Sondai-aq biyl naýryz aiynda tórt kún ishinde 310 dron shabýyly tirkelse, mamyrda qalaǵa 120-dan astam ushqyshsyz apparat shabýyl jasaǵan.
Alaida sońǵy shabýyl atyp túsirilgen drondar sany boiynsha rekordtyq kórsetkishke jetti.
