Qasym-Jomart Toqaev Taza Qazaqstan aktsiiasy aiasynda sóz sóileý barysynda ekologiialyq mádenietti qalyptastyrý isinde bilim júiesine basa mán berýdi mańyzdy másele retinde atady, dep habarlaidy Dalanews.kz
– Tazalyqtyń tiregi – tárbie. Balalardy ekologiialyq mádeniet pen eńbekke mektep jasynan baýlý qajet. Sondyqtan ekologiialyq aktsiialarǵa oqýshylar men stýdentterdiń belsene qatysqany jón. Osyǵan orai, Oqý-aǵartý ministrligine «Jasyl sabaqtar» jobasyn qabyldaýdy tapsyramyn. Bilim ordalarynda sýdy jáne qýat kózin únemdeý, qorshaǵan ortany qorǵaý isin dáripteitin bastamalardy qolǵa alý qajet. Sondai-aq oqýshylar men stýdentterdiń ekologiia máselesine arnalǵan ǵylymi izdenisterine jan-jaqty qoldaý kórsetý kerek. «Taza Qazaqstan» halqymyzdy jańa sapalyq deńgeige kóteretin ulttyq ideia bolýǵa tiis. Ony qoǵamda tereń ornyqtyrý úshin mádeniet salasynyń, ásirese, kreativti indýstriianyń áleýetin barynsha paidalanǵan jón. Eńbekqorlyq, uqyptylyq, adaldyq, jasampazdyq qundylyqtary filmder, serialdar arqyly da nasihattalýǵa tiis. Bul jumysta buqaralyq aqparat quraldary men áleýmettik jeliniń de múmkindigin durys qoldaný kerek, – dedi Memleket basshysy.
Prezident qazir elimizde túbegeili ózgeristerdi qolǵa alynyp, aýqymdy reformalar júzege asyrylyp jatqanyn málimdedi.
– Naýryz aiynda ótken respýblikalyq referendýmda jańa Konstitýtsiiamyzdy qabyldadyq. Osylaisha, el tarihynyń jańa paraǵyn ashtyq. Bizdiń túpki maqsatymyz – «Zań men tártip» qaǵidaty berik ornyqqan qaýipsiz jáne ádiletti qoǵam qurý. Jas urpaqqa, iaǵni sizderge órkenietti, bedeldi, damyǵan memleketti amanat etip qaldyrý. Osy jolda bárimiz tabandy eńbek etýimiz kerek. Al Otanǵa qyzmet qarapaiym dúnielerden bastalady. Tal egý, ainalańdy taza ustaý arqyly elge paidaly bolýǵa, iaǵni ultqa qyzmet etýge bolady. Men jastardyń, eriktilerdiń elimizdi kórkeitýge qosqan orasan zor úlesin joǵary baǵalaimyn. Adal eńbekterińizdi erekshe qurmetke laiyq dep sanaimyn. Tazalyq – eń aldymen, ishki mádeniettiń ólshemi. Oi-nieti jáne ary taza adam eshkimge eshqashan qiianat jasamaidy, ondai adam elin de satpaidy. Tártipke baǵynyp, túzý joldan da adaspaidy. Ainalasyna qamqor, jaqyndaryna janashyr bolady. Eldiń kóshin alǵa bastap, ult sapasyn jaqsartýǵa atsalysady. Men bárińizdi dál osyndai azamat dep esepteimin. Barshańyzǵa taǵy da sáttilik tileimin! – dedi Qasym-Jomart Toqaev.
