Soltústik Qazaqstan oblysynda tanysyn baltamen óltirip, máiitin birneshe kún boiy tósektiń astyna jasyryp qoiǵan áielge sot úkimi shyqty, dep habarlaidy Dalanews.kz
Is SQO qylmystyq ister jónindegi mamandandyrylǵan aýdanaralyq sotynda qaraldy. Aiyptalýshy ornynda Beskól aýylynyń 53 jastaǵy turǵyny boldy.
Tergeý materialdaryna sáikes, biyl 27 aqpanda áiel aýlaǵa otyn jarýǵa shyqqaly turǵan sátte onyń tanysy úiine kelgen. Er adam qatty mas kúide bolǵan. Áiel odan ketýin suraǵanymen, ol úide qalýdy talap etken.
Sotta aiyptalýshy er adamdy qorqytý úshin qolyndaǵy baltamen eki ret siltegenin aitqan. Alaida soqqy baltanyń júzimen er adamnyń jelke tusyna tigen. Saldarynan jábirlenýshi jerge qulap túsken.
Osydan keiin áiel edendegi qandy jýyp, qozǵalyssyz jatqan er adamdy bólmege súirep kirgizip, máiitti kereýettiń astyna jasyrǵan.
Odan keiin birneshe kún boiy ol ádettegi tirshiligin jalǵastyryp, jumysqa baryp, kórshilerimen aralasyp, keshke úiine kelip, máiit jatqan kereýettiń ústinde uiyqtap júrgen.
Marqumnyń anasy men aǵasy onyń joǵalǵany týraly politsiiaǵa habarlaǵan. Tártip saqshylary sońǵy ret joǵalǵan azamattyń osy áielmen birge bolǵanyn anyqtaǵan.
Politseiler kúdiktini jumystan úiine alyp kelgen kezde páterden ótkir iis shyqqan. Tekserý barysynda jatyn bólmedegi tósektiń astynan izdeýde júrgen er adamnyń máiiti tabylǵan.
Sotta áiel adam ólimge sebepker bolǵanyn moiyndaǵanymen, adam óltirý nieti bolmaǵanyn aityp, tek qorqytpaq bolǵanyn jetkizgen. Alaida sot bul ýájdi jaýapkershilikten jaltarý áreketi dep baǵalady.
Sondai-aq sottalýshynyń buǵan deiin de adam óltirý jáne densaýlyqqa aýyr ziian keltirý baptary boiynsha sottalǵany anyqtaldy. Osyǵan bailanysty onyń áreketinde qaýipti qaitalaný belgisi tanyldy.
Sot úkimimen áiel 14 jylǵa bas bostandyǵynan aiyrylyp, jazasyn qaýipsizdigi barynsha joǵary mekemede óteitin boldy. Sonymen qatar oǵan jazasyn óteý ornynda alkogolizmnen májbúrli em taǵaiyndaldy.
Úkim zańdy kúshine engen joq. Sottalǵan áiel apelliatsiialyq shaǵym túsirmek.
