سولتۇستىك قازاقستان وبلىسىندا تانىسىن بالتامەن ءولتىرىپ، ءمايىتىن بىرنەشە كۇن بويى توسەكتىڭ استىنا جاسىرىپ قويعان ايەلگە سوت ۇكىمى شىقتى، دەپ حابارلايدى Dalanews.kz
ءىس سقو قىلمىستىق ىستەر جونىندەگى مامانداندىرىلعان اۋدانارالىق سوتىندا قارالدى. ايىپتالۋشى ورنىندا بەسكول اۋىلىنىڭ 53 جاستاعى تۇرعىنى بولدى.
تەرگەۋ ماتەريالدارىنا سايكەس، بيىل 27 اقپاندا ايەل اۋلاعا وتىن جارۋعا شىققالى تۇرعان ساتتە ونىڭ تانىسى ۇيىنە كەلگەن. ەر ادام قاتتى ماس كۇيدە بولعان. ايەل ودان كەتۋىن سۇراعانىمەن، ول ۇيدە قالۋدى تالاپ ەتكەن.
سوتتا ايىپتالۋشى ەر ادامدى قورقىتۋ ءۇشىن قولىنداعى بالتامەن ەكى رەت سىلتەگەنىن ايتقان. الايدا سوققى بالتانىڭ جۇزىمەن ەر ادامنىڭ جەلكە تۇسىنا تيگەن. سالدارىنان جابىرلەنۋشى جەرگە قۇلاپ تۇسكەن.
وسىدان كەيىن ايەل ەدەندەگى قاندى جۋىپ، قوزعالىسسىز جاتقان ەر ادامدى بولمەگە سۇيرەپ كىرگىزىپ، ءمايىتتى كەرەۋەتتىڭ استىنا جاسىرعان.
ودان كەيىن بىرنەشە كۇن بويى ول ادەتتەگى تىرشىلىگىن جالعاستىرىپ، جۇمىسقا بارىپ، كورشىلەرىمەن ارالاسىپ، كەشكە ۇيىنە كەلىپ، ءمايىت جاتقان كەرەۋەتتىڭ ۇستىندە ۇيىقتاپ جۇرگەن.
مارقۇمنىڭ اناسى مەن اعاسى ونىڭ جوعالعانى تۋرالى پوليسياعا حابارلاعان. ءتارتىپ ساقشىلارى سوڭعى رەت جوعالعان ازاماتتىڭ وسى ايەلمەن بىرگە بولعانىن انىقتاعان.
پوليسەيلەر كۇدىكتىنى جۇمىستان ۇيىنە الىپ كەلگەن كەزدە پاتەردەن وتكىر ءيىس شىققان. تەكسەرۋ بارىسىندا جاتىن بولمەدەگى توسەكتىڭ استىنان ىزدەۋدە جۇرگەن ەر ادامنىڭ ءمايىتى تابىلعان.
سوتتا ايەل ادام ولىمگە سەبەپكەر بولعانىن مويىنداعانىمەن، ادام ءولتىرۋ نيەتى بولماعانىن ايتىپ، تەك قورقىتپاق بولعانىن جەتكىزگەن. الايدا سوت بۇل ءۋاجدى جاۋاپكەرشىلىكتەن جالتارۋ ارەكەتى دەپ باعالادى.
سونداي-اق سوتتالۋشىنىڭ بۇعان دەيىن دە ادام ءولتىرۋ جانە دەنساۋلىققا اۋىر زيان كەلتىرۋ باپتارى بويىنشا سوتتالعانى انىقتالدى. وسىعان بايلانىستى ونىڭ ارەكەتىندە ءقاۋىپتى قايتالانۋ بەلگىسى تانىلدى.
سوت ۇكىمىمەن ايەل 14 جىلعا باس بوستاندىعىنان ايىرىلىپ، جازاسىن قاۋىپسىزدىگى بارىنشا جوعارى مەكەمەدە وتەيتىن بولدى. سونىمەن قاتار وعان جازاسىن وتەۋ ورنىندا الكوگوليزمنەن ءماجبۇرلى ەم تاعايىندالدى.
ۇكىم زاڭدى كۇشىنە ەنگەن جوق. سوتتالعان ايەل اپەللياسيالىق شاعىم تۇسىرمەك.
