Jambyl oblysynda ózin Angliiaǵa jumysqa ornalastyramyn dep tanystyrǵan áieldiń qurbany bolǵan 10 turǵyn politsiiaǵa júgindi, dep habarlaidy Dalanews.kz Jetinshi arnaǵa silteme jasap.
Jábirlenýshilerdiń aitýynsha, kúdikti olardy Angliiadaǵy jylyjailarda jumys isteisińder dep sendirgen. Onda sańyraýqulaq terip, aiyna 1 million teńgeden astam tabys tabýǵa bolatynyn ýáde etken.
Asa aýylynyń turǵyndary internetten jariialanǵan habarlandyrýǵa senip, kelisimshart jasasqan. Shetelge shyǵý úshin keibiri nesie alyp, týystarynan qaryz suraǵan.
Alaida aqsha tolyq tólengennen keiin áiel bailanysqa shyqpai, joǵalǵan. Zardap shekkender oǵan jalpy 5 million teńgeden astam qarjy aýdarǵandaryn aitady.
Jábirlenýshilerdiń biri Nurǵisa Ibragimov jumysynan shyǵyp, shetelge tabys tabýǵa baramyn dep úmittengenin, alaida qazir jumyssyz ári qaryzǵa batqanyn aitty.
Jambyl oblystyq politsiia departamenti málimetinshe, alaiaqtyq faktisi boiynsha qylmystyq is qozǵalǵan. 29 jastaǵy kúdiktiniń jeke basy anyqtalyp, halyqaralyq izdeýge jariialanǵan.
Qazir ony ustaý boiynsha jedel-izdestirý sharalary júrgizilip jatyr.
