“Qazaqmys” Toby úshin mineraldyq-shikizat qoryn damytý basty strategiialyq basymdyqtardyń biri bolyp qala beredi. Búginde geologiialyq barlaý jumysynyń basym bóligi Qazaqstannyń mys ónerkásibiniń tarihi ortalyǵy jáne kompaniianyń qyzmet etetin negizgi óńiri — Ulytaý oblysynda shoǵyrlanǵan, dep habarlaidy dalanews.kz.
2026 jyly "Qazaqmys" Jezqazǵan óńirindegi geologiialyq barlaý jumysyn qarjylandyrýdy aitarlyqtai ulǵaitty. Buǵan deiin bul maqsatqa jyl saiyn shamamen 5 mln AQSh dollary baǵyttalsa, búginde investitsiia kólemi jylyna 40 mln dollarǵa deiin jetti. Qarajat Jezqazǵan ken alabynyń tereń qabatyn zertteýge, jańa perspektivaly ýchaskelerdi izdeýge jáne óńirdiń mineraldyq-shikizat qoryn keńeitýge baǵyttalýda.
Sonymen qatar kompaniia burǵylaý jumysynyń kólemin aitarlyqtai arttyrýda. Eger aldyńǵy jyldary paidalaný maqsatyndaǵy burǵylaýdyń kólemi jylyna shamamen 63 myń tekshe metrdi qurasa, 2026 jyly tek Jezqazǵan baǵyty boiynsha 62,4 myń tekshe metr geologiialyq barlaý úshin burǵylaý júrgizý josparlanǵan. Bul rette aita keterligi, Jezqazǵan kompaniianyń geologiialyq barlaý baǵdarlamasyndaǵy úsh óńirlik baǵyttyń biri bolyp sanalady. Osyǵan orai geologiialyq barlaý jumysynyń jalpy aýqymy shamamen eki esege ulǵaidy.
Baǵdarlamany iske asyrý úshin Ulytaý oblysynda qazirdiń ózinde alty zamanaýi jerústi burǵylaý qondyrǵysy iske qosyldy. Buǵan qosa jalpy quny 1,3 mlrd teńgeni quraityn úsh jerasty burǵylaý agregaty men qosalqy tehnikany satyp alý jumysy júrgizilýde. Jerústi burǵylaý jumysyna arnalǵan eki burǵylaý qondyrǵysy kúrdeli jóndeýden ótti. Sondai-aq burǵylaý brigadalarynyń jumysyna qolaily jaǵdai jasaý jáne infraqurylymdy jańartý jumysy jalǵasýda.
2025 jyly júrgizilgen geofizikalyq zertteýdiń qorytyndysy boiynsha úsh perspektivaly ýchaskede burǵylaý jumysy bastaldy. Ońtústik Itaýyz, Sorkudyq–Jartas ýchaskelerinde jáne Jylandy ken oryndary tobynda qosymsha jumys atqarý josparlanǵan. Tereń qabattarda júrgizilip jatqan zertteýler Jezqazǵan ken ornynyń geologiialyq qurylymy týraly jańa derek alýǵa, sondai-aq tereńde jatqan ken deneleriniń áleýetin baǵalaýǵa múmkindik beredi.
Ken oryndarynyń tereń qabaty men qaptaldaryn zertteý jobalaryna salynǵan jalpy investitsiia kólemi tehnika satyp alýdy qospaǵanda 2,27 mlrd teńgeni quraidy. Mamyr aiynan bastap qosymsha burǵylaý kúshi jumyldyrylyp, shilde aiyna qarai óndiristik alańdarda onǵa jýyq burǵylaý qondyrǵysyn paidalaný josparlanýda.
Júrgizilgen júieli geologiialyq barlaý jumysynyń nátijesinde kólemi 63,5 mln tonna kendi quraityn rezervtik ken oryndarynyń portfeli qalyptastyryldy. Onyń quramynda 620,3 myń tonna mys jáne 12,9 tonna altyn bar. Bul qordyń eleýli bóligi memlekettik balansqa engizildi.
Sonymen qatar kompaniia zamanaýi tsifrlyq tehnologiialardy belsendi túrde qoldanýda. Geologiialyq bólimshelerde ken oryndarynyń úshólshemdi modelin qurýǵa jáne geologiialyq derekti interpretatsiialaý dáldigin arttyrýǵa múmkindik beretin Micromine júiesi engizilýde. Baǵdarlama boiynsha 177 maman oqytýdan ótti, bolashaqta júieni paidalanýshylar sanyn 401 qyzmetkerge deiin arttyrý josparlanýda.
Kompaniiada atap ótilgendei, Ulytaý oblysyndaǵy geologiialyq barlaý jumysyn keńeitý óńirdiń bolashaǵyna salynǵan investitsiia bolyp tabylady. Jańa qorlar qoldanystaǵy óndiristik qýatty turaqty júktememen qamtamasyz etip, jumyskerlerdiń uzaq merzimdi jumyspen qamtylýyna ári Jezqazǵan óńirindegi taý-ken metallýrgiia kesheniniń odan ári damýyna jol ashady.
