Malaiia ýniversitetiniń ǵalymdary shokolad iisiniń jattyǵý kezindegi fizikalyq ónimdilikke áserin zerttedi. Nátijesinde kakao hosh iisin seziný kei jaǵdaida júktemeni kóbirek oryndaýǵa kómektesýi múmkin ekeni anyqtalǵan, dep habarlaidy dalanews.kz.
Frontiers in Physiology jýrnalynda jariialanǵan zertteýge 20-25 jas aralyǵyndaǵy, dene daiyndyǵy ortasha 23 er adam qatysqan.
Tájiribe aldynda qatysýshylar keminde 10 saǵat boiy tamaq ishpegen. Keiin olar úsh topqa bólinip, 90 paiyz kakaosy bar qara shokoladtyń, 60 paiyz kakaosy bar sútti shokoladtyń nemese baqylaý retinde sýdyń iisin sezgen.
Aiaqty jazýǵa arnalǵan jattyǵý kezinde qara shokolad iisin sezgen qatysýshylar baqylaý tobymen salystyrǵanda orta eseppen 18 qaitalaýdy kóbirek oryndaǵan. Al sútti shokolad iisi kórsetkishti shamamen 9 qaitalaýǵa arttyrǵan. Zertteýshilerdiń aitýynsha, qyzyǵy – qatysýshylar júktemeniń burynǵydan aýyr bolǵanyn sezbegen.
Shokolad iisi tábetke de ártúrli áser etken. Qara shokoladtyń iisi ashtyq sezimin báseńdetip, toqtyq sezimin kúsheitse, sútti shokoladtyń hosh iisi qatysýshylarǵa jaǵymdyraq áser bergen. Ǵalymdar muny midyń tanys taǵam iisterin toqtyq jáne tamaq kútý sezimimen bailanystyrýymen túsindiredi. Degenmen zertteý shaǵyn toppen jáne tek jas er adamdar arasynda júrgizilgen. Sondyqtan bul áserdiń áielderge, basqa jastaǵy adamdarǵa nemese kásibi sportshylarǵa dál osylai áser etetini ázirge belgisiz.
Zertteý avtorlary aldaǵy ýaqytta bul qubylystyń biohimiialyq mehanizmderin anyqtap, nátijeni basqa toptarda da tekserýdi josparlap otyr.
