Ulybritaniia ǵalymdary alǵash ret adam kózine jasyl reńkte kórinýi múmkin juldyzdy anyqtady. Erekshe aspan denesiniń túsine onyń atmosferasyndaǵy himiialyq elementter áser etken, dep habarlaidy dalanews.kz.
Ýorik ýniversitetiniń astronomdary 15 qazanda RAS Techniques and Instruments ǵylymi jýrnalynda aq ergejeili juldyzdardyń túsin adam kóziniń qalai qabyldaityny týraly zertteý nátijelerin jariialady.
Ǵalymdar juldyzdardyń sáýle shyǵarý spektrin adamnyń kórý qabiletin modeldeý ádisi arqyly taldaǵan.
Ádette juldyzdardyń túsi olardyń temperatýrasyna bailanysty bolady. Alaida aq ergejeili juldyzdardyń túsine tyǵyz atmosferasyndaǵy himiialyq elementter de áser etýi múmkin.
Zertteý barysynda ǵalymdar WD J1330+6435 dep atalatyn juldyzdyń erekshe sary-jasyl reńkke ie ekenin anyqtaǵan.
Mamandardyń túsindirýinshe, onyń atmosferasyna burynǵy planetalardyń qaldyqtary túsip, kaltsii, litii jáne natrii siiaqty elementtermen baiytylǵan.
Natrii sary, qyzǵylt sary jáne qyzyl jaryqtyń bir bóligin, al kaltsii kúlgin sáýleni jutady. Sonyń nátijesinde juldyzdyń jaryǵy adam kózine sary-jasyl bolyp kórinýi múmkin.
Zertteý jetekshisi Mark Hollands mundai juldyzdyń kórinisi ǵylymi-fantastikalyq filmdegi kórinisti eske túsiretinin atap ótti.
Ǵalymdar qyzǵylt tústi juldyzdy da zerttedi
Astronomdar Jerden 48 jaryq jyly qashyqtyqta ornalasqan WD J1011+2845 atty taǵy bir erekshe aq ergejeili juldyzdy sipattady.
Onyń túsi albyrt-qyzǵylt reńkke jaqyn. Ǵalymdardyń boljamynsha, bul buryn-sońdy anyqtalǵan eń qyzyl juldyzdardyń biri bolýy múmkin.
Mundai tús juldyzdyń ishki qabattarynan atmosferasyna kóterilgen kómirtek molekýlalarynyń áserinen paida bolǵan.
Zertteý aiasynda astronomdar Jerden 65 jaryq jylyna deiingi qashyqtyqta ornalasqan 151 aq ergejeili juldyzdy taldaǵan.
Olardyń beseýinen erekshe tús anyqtalǵan: ekeýi sary, úsheýi qyzǵylt reńkti bolǵan.
Ǵalymdardyń baǵalaýynsha, shamamen árbir 30-shy aq ergejeili juldyz osyndai erekshe túske ie bolýy múmkin.
Zertteý nátijeleri juldyzdardyń túsi tek temperatýraǵa ǵana emes, olardyń atmosferasyndaǵy himiialyq quramǵa da bailanysty ekenin kórsetedi.
