Qazaqstanda tabiǵi apattardan keletin shyǵyndardy óteýge baǵyttalǵan mindetti turǵyn úi saqtandyrýyn engizý usynyldy. Tiisti zań jobasy «Ashyq NQA» portalynda jariialandy, dep habarlaidy dalanews.kz.
Qujatqa sáikes, turǵyn úilerdi jer silkinisi, sý tasqyny, sel jáne orman órtteri siiaqty tabiǵi tótenshe jaǵdailardan mindetti saqtandyrý kózdelip otyr.
Jyl saiynǵy saqtandyrý jarnasy 0,5-ten 5 AEK-ke deiin bolýy múmkin. Naqty mólsheri baspananyń qunyna jáne óńirdegi tabiǵi qaýip deńgeiine bailanysty belgilenedi.
Mindetti saqtandyrý úkimet tabiǵi qaýip-qater joǵary aimaqtar dep aiqyndaityn óńirlerdegi turaqty turýǵa arnalǵan turǵyn úilerge qatysty qoldanylmaq. Sonymen qatar erikti saqtandyrý polisiniń bolýy menshik iesin mindetti saqtandyrý rásimdeýden bosatpaidy.
Zań jobasyna sáikes, turǵyn úi tolyqtai qiraǵan jaǵdaida saqtandyrý tólemi tólengen jarnanyń 500 esesine deiin, al baspana ishinara búlinse 250 esesine deiin jetýi múmkin.
Sondai-aq tótenshe jaǵdai jariialanǵannan keiin saqtandyrý polisin rásimdeýge jol berilmeidi. Eger saqtandyrý jaǵdaiy rastalsa, tólemdi bes jumys kúni ishinde aýdarý josparlanyp otyr.
Zań jobasyn ázirleýshilerdiń aitýynsha, bul tetik tabiǵi apattardan zardap shekken azamattarǵa qarjylyq qoldaý kórsetýdi jedeldetip, biýdjetke túsetin júktemeni azaitýǵa múmkindik beredi.
Aita keteiik, IýNISEF dereginshe, Qazaqstanda 15 mln adam tabiǵi apattar qaýpi bar aimaqta turady.
